Wimbledon atan Federer a inpeih

Roger Federer-a'n kum 40 a tling hnai tawh a, hliam vangin buai ve fo tawh mah se Swiss star hian Wimbledon khel tura a inpeih thu a sawi - zanin hian a match hmasa ber atan Adrian Mannarino a hmachhawn ang.

French Open-ah Federer hi ṭha takin a inlan a, last 16 thleng hial mah se a inhnukdawk. A inlan chhunzawm loh chhan hi vawi riat a champion tawhna Wimbledon atana insawrbing a duh vang a ni, a thil tum pawimawh zinkawng chu a inṭan dawn.

Grand Slam vawi 20 champion tawh Federer chuan, "Ka inpeih, ka phurin inkhelh hlan ka nghakhlel tawh takzet a ni. Wimbledon title hi a vawi kua nan ka la chawi thei ang tih hi ka beisei tlat a ni," tiin a sawi.

Season hmasa khan Federer hian Wimbledon hi khelh ngei a tum, mahse hripui leng vangin All England Club-ah inelna a awm thei lo. Tun ṭumah hian hlawhtlin a chakna a sang zual dawn tih a chiang hle.

Major title lak hnem lamah Federer hi Rafael Nadal-a'n a nihrual tawh, vawi 19 champion tawh Novak Djokovic pawhin a hnaih tawh hle. Wimbledon title hi a la leh thei a nih chuan a ropuina a belhchhah bakah record sawhngheh lehna a ni ang.

Wimbledon zawh hnua neih tur Olympic chuangchang zawhna chhangin Federer chuan, "Tun inelna ka hman dan hian thui takin nghawng a nei ang," a ti. Tokyo Olympic khelh a tum thu tun hmain sawi tawh mah se, tunah chuan hri leng vangin 100%-in a chiang ta rih lo.

August 8 a lo thlen chuan Federer hi kum 40 a tling tawh dawn, atan kumin hi Wimbledon leh Olympic hnuhnung ber a ni tawh mai thei. Rei tak chhung inkhelh duh mah se hliamin a tih buai tak fo avangin a hun hnuhnung a hnai ve ta niin a lang.

Federer chuan, "Kum 10 liam ta khan Pete Sampras nen kan inkawm a, engtiang chena rei nge ka inkhelh theih ang tih kan sawi dun. Kei chuan kum 40 ka tlin hunah pawh la inkhelh theih ka beisei thu ka sawi, a tirah khan mak an ti hle.

"Mahse, tunah chuan ka thil sawi kha a takin a lo thleng thei dawn ta niin a lang. Kum 40 bawra vela ka inkhelh theih ring lotu kha a tam zawk ni mah se beiseina nen chuan thil hi a tih theih dan a awm ṭhin," a ti.