Ukraine vs Sweden: A ṭha zawk a hriat loh!

Euro last 16-a ngaihven hlawh lo ber tih ngam chu zanin dar 12:30-a Sweden leh Ukraine inkhel tur hi a ni a, a phenah erawh thawnthu ngaihnawm tak tak a tam hle lawi si.

Ram pahnih hi an intiat tawk miau avangin last 16-a an inhmachhawn tur hi an lawm ve ve ang tih a chiang a, zaninah pawh team pahnihin minute 90 chhunga engkim chinfel tumin an khel ang.

Euro 2012-ah khan team pahnih hi group stage-ah an lo intawng tawh a, Ukraine-in 2-1 in Sweden hi an hneh - he inkhelah hian Andriy Shevchenko chuan goal hnih a khung.

Ukrainian striker ropui hian tunah chuan an ram team a enkawl tawh a, player-a nih laia a lo ngam tawh team hi coach ni chungin hneh ngei a tum dawn.

Vanneihna
Euro 2020 last 16 lut zingah Ukraine tluka vannei an awm lo tih ngam a ni - group stage-ah North Macedonia an hneh tih loh chu chhuan tur an nei lo a, point thum hmangin pathumna ti ṭha pali zingah an inhamtang hram.

Ukraine vanneihna a kaltluang - group stage match tawp bera anmahni hneha pahnihna ni zui Austria-in Italy an tum laiin team nem zawka ngaih Sweden an hmachhawn dawn a, chak loh chu an tan mualphona tur a ni.

Shevchenko-a player zingah Oleksandr Zubkov chu a inlan theih loh a rinawm zawk a, Viktor Tsyhankov dinhmun a la chiang lo bawk - mahse, Ruslan Malinovskyi-te ho an awm avangin buaina tur a awm lo.

Ukraine-in last 16 paltlang an duh a nih chuan group stage-a an khelh dan anga khelh a thiang lo - tlarhnung lamin insiamṭhat an mamawh a, Oleksandr Zinchenko, Andriy Yarmolenko leh Roman Yaremchuk ten an theihna tak tak an pholan a ṭul bawk.

Sweden an thiam?
Euro 2020-ah rin loh taka team hmuhnawm pawl thlang dawn ila, Sweden hi lam hmasak zingah an tel hial mai thei - Spain, Slovakia leh Poland te nen group khatah an awmho a, point sarih hmuin group hmahruaitu an ni thei.

Sweden tan attacking midfielder Emil Forsberg-a'n Inrinni khan training zawm lo zuai mah se ngai a awh leh tawh a, amah ngeiin, "Inven nana ti kan ni," a tih avangin zaninah inlan tura beisei a fuh ang - RB Leipzig player hian tun inelnaah goal thum a khung tawh.

Inelna ṭantir lama Covid-19 kai Dejan Kulusevski leh Bologna midfielder Mattias Svanberg te dinhmun a ṭha leh tawh a, Juventus winger Kulusevski phei chu Poland lakah bench aṭanga lut chungin assist vawi hnih a nei a, a hmuhnawm takzet.

Mahse, coach Janne Andersson tan Kulusevski bul ṭantir nghal ai chuan mual sira khel ṭha sa Forsberg leh Sebastian Larsson khelh duntir chu fuh tur zawka ngaih a ni a, bench aṭanga danglamna thlen tura Kulusevski luhtir a fuh ang.

Beiseina
Kum 2015 khan Sweden hi Euro Under-21 inelnaah an champion a, kha inelnaa champion team aṭang khan player panga chu Euro 2020 Sweden squad-ah an awm.

Euro U21 nomawi chawi zinga mi Ludwig Augustinsson chuan, "Tih theih loh engmah a awm lo tih min hriattir a ni," tiin an hlawhtlinna chungchang a sawi a, last 16 piahlam thleng a thlir.

Werder Bremen defender Augus-tinsson hi tlarhnungah Manchester United defender Victor Lindelof, Mikael Lustig leh Marcus Danielson te nen an inkawp a, group stage-ah goal hnih chiah an chhuah - Lindelof hi kum 2015-a Euro U21 nomawi chawi zingah khan a tel.

Sweden tan tlarhmaah Alexander Isak chu player hmuhnawm ni leh tura ngaih a ni a, Mainz striker Robin Quaison nge tawnhriat nei ṭha Marcus Berg a kawp ang, tih erawh zawhna awm mek a la ni.