Brazil chak tluang lai an chelh

Copa America 2021 khelh laiah champion tura rinkai Brazil chak tluang lai a tawp. Tite naute hi an match hmasa pathuma an chak hnuah nimin zing khan Ecuador nen 1-1 in an inhnehtawk.

World champion vawi nga ni tawh Brazil hian group hmahruaitu an ni chiang tawh tih hre chungin Ecuador hi an hmachhawn a, player ṭha leh chhawr rimte an hahchawlh tir chungin point khat an hlawh chhuak tho.

Inhnehtawk
Goiania-a inkhelah Brazil hian an thiampuipa Neymar an chhawr lo a, goal erawh chawlhlawk hmain an nei hman lo. Minute 37-naah Eder Militao chuan Everton Soares-a freekick chu chiang zetin a tauh lut.

Tla thei dinhmuna la ding Ecuador lamin thapui an thawh, second half tir lamah Enner Valencia-a ball khen pial dawngtu Angel Mena chuan siphurh sutin an goal an venghim tluan a, quarterfinal lut tura an point mamawh zat an hmu.

Tite-a'n Copa America chauh ni loin nakkuma neih tur World Cup a thlir a, goalkeeper pawh a siksawi zel. Alisson leh Ederson a inchhawr chhawk a, tun ṭumah hian Liverpool keeper zawkin si ban a nghak a, hna hautak thawh tur a nei hran lo.

Venezuela an tla
Copa America-ah hian South American ram 10 bakah khawmualpui dang aṭanga sawm belh ram pahnih, an vaiin team 12 an inel ṭhin. Kuminah hian hri leng vangin khawmualpui dang atanga an inlan theih loh avangin team 10 chauh an inel.

Group pahnihah ṭhen hran an ni a, quarterfinal luh hi thil harsa niin a lang lo. Mahse, Venezuela tan erawh a awlsam chuang lo. Nimin zing khan Venezuela hi Peru lakah 1-0 in an tlawm a, team panga inel zinga hniam ber niin an zinkawng a tawp.

Group lehlam aṭangin Argentina, Chile, Paraguay leh Uruguay te pawh an tlang tawh. Tukin khan group match an khel zo ve dawn chiah a, tling chiang tawh mah se a san dan tur indawt a la chiang lo a, inkhel an la ngai pawimawh ang.