Olympic-ah Serena inlan dawn lo

Serena Williams chuan Tokyo Olympic a khelh loh tur thu a tichiang a, infiamna khawmpui lian ber a hmachhawn dawn loh chhan tak erawh a sawi chiang duh lo thung.

Kum 39 mi Williams hian Sydney 2000 khan a Olympic hmasa ber a khel ṭan, an ram United States tan gold medal ringawt pawh vawi li a vaw chhuak tawh a, tunah chuan a kum a tam tawh bakah hri leng vangin zin tam loh a duh nia rin a ni.

American star Serena chuan, "Kumina ka hmachhawp zingah Olympic a tel lo, a chhan erawh ka sawi thei lo," tiin Wimbledon khel tura media a hmachhawn ṭumin a sawi chhuak.

Grand Slam vawi 23 champion tawh Serena hian fanu kum thum mi Olympia a nei a, tun hma deuh khan hri leng vanga Japan inkaihhruaina chu a fanu hruaina chi ni loa a hriat thu a lo sawi tawh.

Olympic khel dawn lo mah se nimin aṭanga khelh ṭan Wimbledon-ah erawh Serena hi a inlan dawn, grass court inelna lianah hian seeded parukna pek niin zanin hian a match hmasa ber atan Aliaksandra Sasnovich a hmachhawn ang.