NBA Playoff : Milwaukee an chak nawn

Nimin zing khan Milwaukee Bucks chuan Atalanta Hawks lakah 113-102 in hnehna an chang. Eastern Conference finals match hmasa berah chak lo mah se tun hnaiah a zawnin vawi hnih an chak a, best of seven series-ah 2-1 in hma an hruai ta.

Milwaukee tan Giannis Antetokounmpo leh Khris Middleton te chu chhandamtu an ni. Player ṭha bik pahnihin point an neih belhkhawm hi 71 zet a ni a, a bik takin quarter hnuhnung ber bika point 20 neitu Middleton a pawimawh zual.

NBA Most Valuable Player vawi hnih ni tawh Antetokounmpo-a'n point 33 a neih bakah rebound vawi 11 a la a, ani chet dan hian conference champion an nih leh nih loh mai bakah, NBA Finals boruak thlengin a hril thui hle ang.

Greek tlangval Antetokounmpo chuan, "Ka beisei phak baka ṭhain kan khel, tun anga kan khel zel thei a nih chuan a aia sang zawk pawh kan beisei ngam tur a ni ang," tiin conference champion an nih theih a beisei thu a sawi.

Inkhel tir lamah Hawks an che ṭha zawk, hmahruaitu ni turin Bucks lamin quarter thumna thleng an nghah a ngai. Bobby Portis-a lay-up hmangin 82-80 in hma an hruai a, a hnu lamah erawh an hawikir tawh lo.

Quarter hnuhnung berah Milwaukee lamin point 30 an neih theih laiin Hawks lamin point 17 chiah an neih belh. Inkhel pumpuiah Hawks tana point nei hnem Trae Young-a'n point 35 nei thei mah se thlawptu ṭha a neih loh an tuar.

Eastern Conference Finals
Game 1: Atlanta Hawks 116 - 113 Milwaukee Bucks
Game 2: Milwaukee Bucks 125 - 91 Atlanta Hawks
June 28, Thawhṭanni
Game 3: Atlanta Hawks 102 - 113 Milwaukee Bucks
June 30, Nilaini
Game 4: Atlanta Hawks 06:00 AM Milwaukee Bucks
July 2, Zirtawpni
Milwaukee Bucks 06:00 AM Atlanta Hawks
(Milwaukee lamin series-ah 2-1 in hm an hruai)