Hamilton hmaah Verstappen a thleng nawn

Formula 1 champion lai leh champion leh ngei tura rinkai Lewis Hamilton-a'n tun hnaiah ngam loh a nei. Mercedes driver hian inelna neih hnuhnung pahnihah Max Verstappen a tluk loh avangin title humhim a harsa dawn.

Pathianni zana tlan zawh tak F1 Styrian Grand Prix-ah a hmasa ber aṭanga bul ṭantu Verstappen tan buaina tur a awm lo. Red Bull driver hian a elpui Lewis aiin 35 seconds zetin a thleng hma zawk.

Red Bull team principal Christian Horner chuan, "Tun season inelna kan neih laiah tun ṭum hi kan chak chian ber ṭum a ni, a tir aṭanga a tawp thleng khan intlansiak kan thunun vek," tiin a sawi a, hnehna changtu Verstappen pawhin a pawmpui hle.

Tun hnai season sarih chhunga team champion ni vek Mercedes tan erawh inenfiah a ngai hle, a zawnin intlansiak paliah an chak ta lo. Team principal Toto Wolff chuan, "Kum riat chhunga kan hun harsa ber a ni," tiin a sawi.

Mercedes hian F1 an thunun rei tawh a, 2016 khan Nic Rosberg-a'n title a la ve zauh tih bak chu an driver chuam Hamilton-a'n tun hnai season sarih chhungin nomawi vawi ruk a chawi hial a, kuminah erawh Red Bull leh Max lakah an chungnung thei rih lo.

Britain tlangval Hamilton chuan, "Zep tur a awm lo, an chak zawk, keini aiin an tlan chak zawk a ni," tiin Red Bull chungchang a sawi a, hmasawn a duh. Hamilton hian tun season daih bak Mercedes tan contract a nei lo, contract thar atan inbiakna a kal mek.