France ngamtu Switzerland

World champion France chu Thawhṭanni zan khan Switzerland lakah an tlawm a, European Championship aṭangin Les Bleus an tla. Bucharest-a inkhel hmuhnawm bikah hian penalty shootout hmangin chak zawk zawn a ṭul a, Kylian Mbappe chiahin a hlah.

Euro last 16-ah champion rinkai ber tia chhal ngam France-in Switzerland an hmachhawn a, hun pangngaiah 3-3 a an inhnehtawk hnuin extra time khelh a ni a, goal a luh belh lo. Penalty shootout-ah Switzerland an vannei ta zawk a, 5-4 in hnehna an chang.

Vladimir Petkovic hoten July 2, Zirtawpni zan dar 9:30-ah Spain an hmachhawn dawn a, an inkhelhnna tur hmun hi Saint Petersburg, Russia a ni. Switzerland-in Euro 2016 khan last 16 an lut a, tun hi Euro C'ship-a quarterfinal an thlen vawi khatna a ni.

Goal ruk
Switzerland-in bul an ṭan fuh zawk a, minute 15-na lekah Steven Zuber-a cross chu Haris Seferovic-a'n a tauh goal. France tlarhnung an muthlu a tih theih a, Zuber vengtu Benjamin Pavard-an a ti ṭha tawk lo a, Seferovic vengtu Clement Lenglet pawh tun inelnaa a bul ṭan vawi khatnaah a mualpho nghal.

First half-a hmuhnawm chhunzawm a, goal erawh a luh belh lo. Minute 55-naah Zuber-a'n Pavard lakah penalty a hlawh chhuak a, Ricardo Rodriguez penalty pet chu Hugo Lloris-a'n a dansak. Swiss vanduai hmahruai angah a ngaih theih hial.

France an che ṭha zui a, Benzema-a'n minute thum (57 leh 59) chung lekin goal hnih a khung a, darkar khat hnuah chak tura rinkai zawkin 2-1 in hma an hruai. Player talent ṭha tamna Les Bleus tan Paul Pogba-a'n minute 75-naah goal ropui a khung a, box pawn aṭangin goal kilah a pet lut.

Manchester United midfielder Pogba hi a goal khung lawm nan a lam zui a, Swiss player-te an hnual phah lo. Vladimir Petkovic-a'n chak tumin bench aṭangin Kevin Mbabu, Ruben Vargas leh Mario Gavranovic te an lut a, anni ho hi world champion hmaah a thlun phelh ang zar zar an ni.

Minute 81-naah Mbabu cross chu Seferovic-a'n a tauh goal a, 3-2 a nih tak avangin Switzerland an phur thar. Subsitute Ruben Vargas goal khung chu offside vangin pawm a ni lo a, an beidawn phah lo.

Minute 90-naah Gavranovic-a'n captain Granit Xhaka hnen aṭanga a ball hmuh chu la lutin defender Presnel Kimpembe a bum hnuah goal ṭha leh pawimawh a khung. Injury time-ah Les Bleus subsitute Kingsley Coman-a'n cross bar a pet per a, a goal miau loh avangin extra time khelh a ṭul phah.

Penalty chu
Extra time-ah France-in goal khung theihna hun ṭha an ngah zawk a, an khung belh theih loh avangin penalty hmangin chak zawk zawn a ṭul. Ṭhumvawrah Switzerland an vannei a, pet hmasak an thlang.

Switzerland tana pettu Gavranovic, Fabian Schar, Manuel Akanji, Ruben Vargas leh Admir Mehmedi ten an pet goal vek a, chutihrualin a palinaa pettu Vargas-a penalty pet chu France keeper Lloris-a'n khawih fuh hman mah se goal a lut tho.

France tana pet hmasa pali Pogba, Olivier Giroud, Marcus Thuram leh Kimpembe ten ṭha takin an pet goal vek a, a tawp berah Mbappe a rawn chhuak. Euro 2020-a goal khung lo Mbappe hian goal zawnah pet mah se Sommer-a'n a dansak.

Switzerland chu chenna ngai loh ramah an cheng a, World champion France hnehin last 16 an lut. Vladimir Petkovic hoten group stage-ah Italy 3-0 in an hneh lo a, Wales nen 1-1 a an inhnehtawk bakah an hneh chhun Turkey pawh last 16 lut pha lo ni mah se team ṭha bera ngaih Les Bleus an hneh.

France tlarhnung pawp
Euro 2020-ah France-in an match hmasa bera Germany 1-0 a an hneh ṭum chauhin clean sheet an nei a, a hnua match thum an khelhah chak an nei tawh lo a, goal an chhuah vek bawk. Les Bleus hi Hungary (1-1), Portugal (2-2) leh Switzerland (3-3) nen an inhnehtawk vek a, goal an chhuah hnem tulh tulh bawk. Germany an hmachhawn ṭumin tlarhnungah Benjamin Pavard, Raphael Varane, Presnel Kimpembe leh Lucas Hernandez te awmin an khawng ṭha hle.

Defence pui turin N'Golo Kante an nei a, France tlarhnung ṭhatzia hahipin an fak. Hungary hmaah Hernandez aiah Everton Lucas Digne a rawn lut a, goal khat an chhuah. Portugal lakah Hernandez a rawn lut ve thung a, Pavard aiah Sevilla defender Jules Kounde a rawn lut thung.

Switzerland nen Digne leh Kounde te an inhliam a, Hernandez a dam chian loh bawk avangin tlarhnunga pali ding ṭhin chu pangaah an thlak a, pathum tiin a sawi theih bawk. Kimpembe leh Varane te kianga ding turin Barcelona defender Clement Lenglet chu a vawi khat nan a rawn inlan a, mual sirah Pavard leh Adrien Rabiot te an awm. Bayern Munich defender Pavard a che ṭha lo a, penalty chawitu a ni.

Barca defender Lenglet pawhin Haris Seferovic tauh goal lut tur a dang thei lo a, PSG defender Kimpembe pawhin Swiss forward Mario Gavranovic goal khung tur a dang thei lo. France-in goal thum an chhuah satliah lo a, 3-1 a hma an hruai hnuah an goal neih an hum thei lo. France tlarhnung pawp chhanna mawhphurtu chu coach Didier Deschamps a ni. Real Madrid president Florentino Perez chuan ni li liam ta khan Zinedine Zidane-a'n France enkawl a duh thu leh a hlawhtlin ngei a rin thu a lo sawi tawh.

Amaherawhchu coach Deschamps chuan, "Team chhung kan inlungrual. Kan chet ṭhat loh chungchangah mawhphurtu ka ni a, ka player-te thlavang ka hauh a, anni pawh ka lamah an ṭang. Kan rilru na thawi dam nan hun kan mamawh ang," tiin a sawi a, ban mai a tum lo.

Mbappe tan Euro mangchhia
Ram ṭha an tlak rualin player ṭha an tla tel ṭhin. Belgium-in Portugal an pet tlak khan Cristiano Ronaldo a tla tel a, amaherawhchu Portugal captain hian goal nga a khung hman. Kum thum liam taa World Cup-a France champion puitu Kylian Mbappe erawhin Euro 2020-a match li an khelhah inlan vek mah se goal khatmah a khung lo. Hetah hian a la tawp lo a, Les Bleus hi Mbappe penalty pet goal loh vanga tla an ni.

Kum 22 mi Mbappe hian season hman zawh takah khan Paris Saint-Germain tan inelna hrang hrangah goal 42 a khung a, a vanglai hun a hmang. Amaherawhchu Mbappe hian club tana a chet ṭhat hi ram tan a chhunzawm thei lo a, group stage-ah goal a khung loh bakah Switzerland nen an inkhelh ṭum hian chance ṭhahnem tak a hlah.

Hetichung hian Les Bleus-in Mbappe hi an ringtawk a, panganaah an pettir. England defender hlui Gary Neville chuan, "Mbappe a rawn kal khan, a chance ṭha a hlah hnemzia in hre chhuak ang a, pawi in ti sa ang," tiin French forward chungchang hi a sawi.

Mbappe penalty pet chu Yann Sommer-a'n a dansak a, an chak ta lo. France manager Didier Deschamps chuan, "Kylian Mbappe hian hrehawm a ti takzet a, player dang pawhin a ti. Chutihrualin tumah a chungah an thinur thei lo ang, mawhphurna la ngamtu a ni tlat," tiin a a sawi.

France leh PSG star Mbappe chuan, "Penalty vangin ngaihdam ka dil. Team puih ka duh a, mahse ka hlawhchham. Fan-te pawhin pawi in tih ka ring a, chutichung chuan min thlawmna leh kan chunga rinna innghah ngam avangin lawmthu ka sawi," tiin ngaihdam a dil.