Duhtak football, i chungah kan lawm e! Croatia 3; Spain 5; Football 100%
"Player leh manager ka nihna angin inkhel boruak sang tam tak ka lo tawng tawh a, mahse, he inkhelah hi chuan engkim a awm a ni," tih chu Spain leh Croatia inkhelh zawha Spain manager Luis Enrique thusawi a ni.
Real Madrid leh Barcelona player hlui, coach a nih hnu pawha Barca tana treble champion ni thei coach thusawi hi chhiar nawn leh la, Croatia leh Spain inkhel ropuizia i hrethiam ang.
Thawhṭanni khan Euro last 16 inkhel hmuhnawmah Spain chuan 5-3 in Croatia an hneh a, a hmuhnawm tih hian a hrilhfiah zo lo - team ṭha pahnih, chak duh ve ve an intawng a, minute 120 hnuah chak zawk chinfel hram a ni.
Spain hian minute 85 thleng chu 3-1 in hma an hruai a, Croatia-in injury time-ah si phurh an sut zo - extra time khelh zui a ni a, team quality sang zawk Spain nihna dik tak a lang chhuak a, goal hnih khung belhin 5-3 in an chak.
Simon, fimkhur rawh...
Spain-in rin ang thlapin an rawn khel a, hnai te tea ball in pass kual chungin Croatia an nawr tawm a, an centre back-te hun hman tam zawkna pawh khelmual laiah a ni!
La Roja hian chance duhawm pawh an nei nghal a, mahse, Alvaro Morata leh Koke ten chance duhthusam an nei chungin goal-ah an chantir thei lo a, minute 20-naah football thilmak a thleng.
Spain keeper Unai Simon-a'n tih tur a nei meuh lo a, he boruak karah hian inkhelah a rilru a pe tawk lo - Pedri back pass chu Simon hian a kein a dang thei lo a, an lamah a lut daih!
Mahse, Spain an hnual phah lo - Sarabia chuan chawlhlawk hmain a rawn chhanglet ve leh a, Euro ṭan dawna squad-a awm pawh inbeisei lo forward hian Euro-ah goal hnih khungin assist vawi hnih a nei tawh.
Spain phawt
Croatia boss Zlatko Dalic-a'n chak loh a duh lo a, tlarhmaa khel ṭha tawk lo Bruno Petkovic la chhuakin second half ṭantirah Kramaric a luhtir nghal. Kum 30 mi striker hi season hman zawh taka Hoffenheim tana match 34-a khelha goal 25 khungtu a nih avangin beiseina a awm.
Mahse, goal khung leh hmasatu erawh Croatia ni loin Spain bawk an ni - Chelsea defender César Azpilicueta chuan ram tana a goal hmasa ber khungin La Roja hi hma a hruai nawn pui a, kum 31 leh ni 304 mi niin Spain tana Euro-a goal khung thei upa ber a ni zui.
Croatia-in beh reng an tum lo - Petkovic ai ngawt chuan Kramaric a hlauhawm zawk tih hmuh turin a awm leh ṭhin a, goal khungtu erawh Spain bawk an ni.
Manchester City forward Ferran Torres-a'n Azpi goal khung tur a siamsak hnuah a khung ve a hun tawhah a ngai a, bench aṭanga luhtir Pau Torres-a ball vawrhsak chu ṭha taka lalutin goal-ah a chantir.
Super Substitute
Torres-a'n goal a khung hian minute 77-na a ni tawh a, team pahnih quality leh goal inthlauhna enin Spain hi tlang mai tura ngaih an ni. Mahse, substitute bench aṭanga luhtir Croatia player-ten ngaihdan dang an nei thung.
Hun tawp nan minute nga chauh a awm tawh tihah Mislav Orsic chuan goal a rawn khung ve leh a, season hman zawh tak Europa League squad of the season-a lang thei player hian a khel ṭha takzet.
Orsic a phur laklawh - Spain-in 3-2 result nen quarterfinal an lut mai dawna a lan hnuah Mario Pasalic tan a siamsak ve leh a, Pasalic hian ṭha zeta tauh lutin a team hi extra time a hruai thleng.
Atalanta midfielder Pasalic hi kum 26 mi lek a ni a, hmabak êng tak a nei - Atalanta hian Euro-ah player pakua ngawt an thawh a, he Italian club player-te hi an che ṭha hlawm hle.
A tawpah a changtupa
A chhungte thahah hial an vau a, social media-a football sawihona reng rengah fiamthu thawh nan an hmang a, Seville khawpuia group stage match an khelh chhung zawngin Morata chu auh el a ni.
Mahse, Copenhagen khawpuiah Real Madrid striker hlui hian auh elna hmanga zam chi a ni lo tih a pholang - a taima a, a thawkrim a, minute 100-na a thlen meuh chuan a theihna tak tak a pholang ta.
Spain beiseina chhi nung turin Morata hian goal ṭha bik a khung a, La Roja an thaw huai - minute 103-naa Oyarzabal-a goal khung pawh a bul tumtu chu Morata a ni a, he striker hian a chance hlah zozai avanga sawisel a phu a nih chuan Croatia laka a khelh dan avangin fak a phu.
A tawpah team tenau zawk 'nemna' a lang a, team huaisen Croatia an tlawm a, chak phu zawk Spain-in hnehna hlado nen a thiam pariat zingah an hming an nem kai ta - Switzerland nen an intawng ang.
Ka tawn atana duhawm lo tak tawng chungin hun ka hmang ngei a, mahse, Spain mipui tam zawk hi ka lam ṭang an ni. Ka goal khung kha ka nupui, ka fate leh engtiklai pawha min thlawptute tan ka hlan a ni. Hetiang ang hun duhawm tawng tur hi chuan tawrhna hmachhawn hmasak fo hi a ngai reng a ni.
- Morata, Spain striker
Khatiang ang game ropui khel leh tur khan ka la inpeih reng a, mahse, ka chhungte leh fan te erawh an inpeih ve kher lo mai thei! Inkhel tawp dan kha kan tan chuan ava mawi tak em. Hnehna chang tura chance hnihna kan nei leh kha ka lawm takzet. Ka career-ah inkhel boruak sang ka lo tem ve fo tawh a, hei erawh a ropui ber zinga mi a ni.
- Luis Enrique, Spain coach
Quarterfinal kan lut hian team ṭha kan nihzia a pholang a ni. Kan khel ṭha takzet a, kan thawkrim em em bawk. Kan inbuatsaihna a ṭha a, team ṭha kan hneh - he inelnaah hian hma kan sawn zel a ni.
- Sergio Busquets, Spain captain
Extra time a thlen kha chuan an dinhmun a derthawng tawh takzet. Mahse, kan chance neih kan chhawr lo zui a, engkim a inthlak danglam zui a ni. Inkhel an thunun a, tho leh turin chakna kan nei tawh lo.
- Luka Modric, Croatia captain
Kan team ang tan chuan player pawimawh pakhat lek chan pawh a uiawm a, pahnih ngawt, Lovren leh Perisic kan chan a ni. Result ṭha hlawh chhuak turin kan theihna zawng zawng kan pe a, kan duh hmu teuh hle.
Knockout round luh ngei hi kan tum hmasa ber chu a ni a, mahse, Spain team ṭha tak nen kan intawng ta si a ni.
- Zlatko Dalic, Croatia coach
Theihnghilh theih a ni lo ang.
- Diario AS, Spanish chanchinbu
Ennawm ropui, a tawpna erawh lungchhiatthlak tak a ni.
- Sportske novosti, Croatian chanchinbu
Denmark-ah ennawm ropui kan hmu a, Vatreni (Croatia sawina) in ti ṭha e, in thlan far tawp thlengin in ṭang a ni.
- Vecernji list, Croatian chanchinbu
A tawrh dan kan thiam tawh a, tunah chuan duhthusam a hun leh ta.
- Marca, Spanish chanchinbu
