Hnehna nen Murray a inlar

Wimbledon khelh ṭan zanah thawnthu ngaihnawm a awm nghal nual. Tualchung tlangval, mipui ṭan rawn ni bawk Andy Murray chu hliam vanga a buai reng hnuah hnehna nen a lo kir - eng tiang chena thui nge a kal theih dawn tih chu chhanna kan hmu thuai dawn.

Novak Djokovic-a'n set hmasa ber a hloh hnuah a tho chhuak thei a, champion tura rinkai zinga mi - seeded pathumna ni phak hial Stefanos Tsitsipas erawh hneh nei loin a puanthuah a tel nghal a ngai ta si.

A lo kir e
Tun hnai kum li chhunga a vawi khat nan Murray-a'n Wimbledon a khel, hliam vanga a buai rei avangin a lakah pawh beisei a sang lo. Mahse, ringhlel chunga thlirtute chhan nan Nikoloz Basilashvili chu 6-4, 6-3, 5-7, 6-3 in a hneh.

Centre Court-ah inkhel entu an awm thei a, Britain tlangval hian ṭantu a nei ṭha. Darkar thum leh minute 32 an inkhelh chhungin talbuai em em lai a nei lo, a match point hmuh hmasa pahnih chelh mah se a hnuah erawh chelh rual a ni ta lo.

Wimbledon vawi hnih champion tawh Murray chuan, "Centre Court-ah ngei mai ka inkhel leh ta chu a ni si, mumang pawh a ang rum rum zawk. Hun harsa tak ka hmachhawn a, khatih lai pawh khan beiseina ka nei tlat ṭhin.

"Tun hi ka tan Wimbledon hnuhnung leh match tawpna a ni mai ang ngem tih ka inzawt ṭhin, ka duh danah chuan a rei thei ang ber inkhelh zel ka la duh," tiin chawlh mai a la tum lo, a match lehpekah chuan Oscar Otte leh Arthur Rinderknech inkhela chak zawk a tum ang.

Number 1 a chak
Novak Djokovic-a'n rawlthar Jack Draper lakah fiahna hautak a hmachhawn nghal. World number 1 hian darkar hnih chhungin 4-6, 6-1, 6-2, 6-2 in hnehna a chang a, vawi nga a champion tawhna hmunah set hloh zet mah se a buai chhunzawm lo.

Serbian star hian a match lehpekah chuan Kevin Anderson a hmachhawn ang. South African star nen hian 2018 final khan an lo intawng tawh a, grass court-a inkhel thiam ve tho a nih avangin inkhel hmuhnawm an chhawp chhuak nghal ang.

Kum 34 mi Djokovic chuan, "Hripui leng vangin infiammi chauh ni loin mipui pawhin sports kha an hlau hman, tunah erawh nunphung pangngai kan hnaih leh ta, a hmuna entu awm ngeia inkhelh chu a nuamin a phurawm zual bik," tiin a sawi.

Djokovic hian French Open nomawi a chawi khan major title 19 a nei tling ta chiah a, tun inelna neih laiah hian a champion leh thei a nih chuan vawi 20 champion tawh Roger Federer leh Rafael Nadal a nihrual ang.

Tsitsipas a tla
Tennis hi - hard court, clay court leh grass court-ah an khel ṭhin a, ball kal dan a danglam vek avangin player-te pawhin inkhelh thiam bikna hmun an nei ṭhin. Seeded pathumna Stefanos Tsitsipas tan pawh Wimbledon chu hmun ṭha a ni lo.

Thla hmasa lawka French Open final lut phak Tsitsipas hi world number 57 Frances Tiafoe lakah 6-4, 6-4, 6-3 in a chak lo. Greek player hi All England Club-ah vawi li a inlan tawh a, ṭum thum chu chak nei loin a tla.

Inkhel dangah Jannik Sinner pawh a chak lo. Italian tlangval seeded 19-na hi Marton Fucsovics lakah 5-7, 6-3, 7-5, 6-3 in a chak lo, inelna neih ṭan zanah mipa singles player zingah seeded chang phak pahnih an tla tihna a ni.

Seeded pangana Andrey Rublev erawhin Federico Delbonis chu 4-6, 6-4, 6-1, 6-2 in a hneh a, seeded pariatna Roberto Bautista Agut pawhin Australian John Millman chu 6-2, 3-6, 6-3, 7-6 (7-4) in a hneh ve bawk.