Clippers beiseina a la nung
Los Angeles Clippers tan NBA Western Conference champion nih beiseina a la nung zel. Clippers hian nimin zing khan Phoenix Suns chu 116-102 in an hneh a, an zinkawng tawp mai thei dinhmuna awm chu an pawtsei.
Game 4 thleng an khelh tawhah Suns lamin vawi thum hnehna an chang thei, game 5 hi an la a nih chuan tlang thei an ni. Mahse, Clippers lamin hnehna an chan ve leh tak avangin game 6 an khelh a ngai dawn.
Clippers tan nidang ang bawkin Paul George a thawh hlawk, court chhunga minute 41 hun a hman chhungin point 41 teh meuh a nei hman a, rebound vawi 13 la bawkin an chakna hnar pawimawh ber a ni.
George chuan, "Theih tawpin kan bei, hnehna kan chan theih nan khan player zawng zawng kan ṭangrual a, tih theih awm zawng zawng chu kan ti vek ni berin ka hria. Hnehna chang tur chuan thawhhona ṭha hi a pawimawh ber," tiin a sawi.
LA Clippers tan hian Reggie Jackson-a'n point 23 a nei bawk, ani bakah hian point 22 neitu Marcus Morris leh DeMarcus Cousins (15) te an chet ṭhat bawk avangin a tir aṭanga a tawp thlengin Suns lakah an chungnung.
