Police-in Benitez vauna chhui dawn

Everton nena sawizawm hlawh mek Rafael Benitez-a in bulah Toffees (Everton sawina) fans ṭhenkhatin banner an hnutchhiah a, "Contract ziak suh, i chenna kan hria a nia," tih a inziak.

He banner dahtu hi Merseyside Police chuan an chhui mek thu an sawi a, detective inspector Darren Taylor chuan, "He thil thleng hian he in chhehvela chengte a ti ralṭi takzet a ni. A ṭawngkam hman hi football kaihhnawih a nih avangin Benitez vauna niah kan ngai a, mahse, an thuziak an tarna erawh Benitez-a in lo zawkah a ni," a ti.

Benitez vauna siamtu chhui chhuak tur hian he in chhehvela CCTV te chu lakkhawm mek an ni a, thuhretute koin chhui chianna neih mek a ni bawk.

Liverpool coach hlui Benitez hi Reds hmelma kumhlun Everton nen sawizawm mek an ni a, khawthlang media-te chuan inbiakna hi thui tak kalpui a nih tawh avangin an inrem ngei an rin thu an tarlang tawh.

Club pahnih inhalna boruak avangin Everton fans zingah Benitez duh leh duh lo an awm nual a, kum 2007 khan Everton hi 'club tenau' tia a lo sawi tawh avangin Toffees fans tam tak chuan an ngaidam thei lo.

Chelsea, Real Madrid leh Inter Milan pawh lo enkawl tawh Benitez-a ṭawngkam hi February 2007, Merseyside derby-a a sawi a ni a, a hnuah Spanish coach hian Everton hrim hrim a sawi chhan ni loin an inkhel bika David Moyes-a defensive game a sawiselna zawk a nih thu a sawi.

Everton hi an coach Carlo Ancelotti chuan June thla khan Real Madrid enkawl turin a chhuahsan a, Benitez hi Italian coach hmun ruak luahtu tur hian an duh a ni - he thuziak i chhiar meuh chuan an inruat fel tawh hial mai thei.

Liverpool leh Everton hi tun hnaiah inthlau viau mah se an thawnthu hlui avangin an la inhal reng a, club pahnih enkawl tawh awmchhun chu William Edward Barclay a ni.

Barclay hian 1888-89 inkar khan Everton a enkawl a, mahse, Anfield chhuahsana Goodison Park din tura lungawi lo engemaw zat an chhuah khan Anfield-a chama Liverpool team thar enkawl a thlang - club pahnih a enkawl theih chhan pawh hi tuna Benitez-a dinhmun nen chuan a inang lo hle.

Benitez hian Liverpool-ah kum ruk hun a hman chhungin Champions League nomawi chu 2005 kha a chawi a, kum 2006-ah FA Cup-ah a champion bawk. Kum 2007 khan Champions League final-ah a hruai thleng leh a, nomawi erawh a chawipui ta lo thung.

Kum 61 mi coach hian Reds a chhuahsan hnu hian Inter, Chelsea, Napoli, Real leh Newcastle United te a enkawl tawh a, January 2021 khan a club hnuhnung ber, Chinese Super League club Dalian Professional a zawm.