Parker-a'n Bournemouth a zawm

Scott Parker chuan Fulham a chhuahsan hnuah Bournemouth a zawm a, kum thum chhung awm turin contract a ziak.

Kum 40 mi coach hian February 2019 aṭang khan Fulham coach hna a chelh ṭan a, mahse, chhanhim zo loin a relegate pui.

Parker hian Championship-ah erawh hun a hmang rei lo - a season hmasa berah playoff kaltlangin Premier League a hruai thleng lehnghal a, mahse, an relegate leh zui.

England international hlui chuan, "He club kalphung, a hmingṭhatna leh chona inchhawpte hian engkim mai hi a ti phurawm em em a ni," tiin Cherries a zawm chhan a sawi.

Parker hian Bournemouth-ah hian amah ang thoa England international hlui Jonathan Woodgate a thlak a, first-team coach Matt Wells, goalkeeping coach Rob Burch, head of performance Alastair Harris, first-team head analyst Jonathan Hill leh lead physical performance coach Charlie Moore ten Fulham chhuahsanin an zui bawk.

Bournemouth chief executive Neill Blake chuan, "Rei tak chhung inbiakna kalpui a ni a, a tawpah kan duh tak kan nei thei ta hi ka lawm hle. Scott hi kan club enkawl tura kan duhthlan hmasa ber a ni a, Tottenham Hotspur academy-a a coaching career a ṭan aṭang khan kan en thla tawh a ni," a ti.

Fulham chuan Parker nen hian inhriatthiam tawnnaa an inṭhen thu an sawi a, club chairman Shahid Khan chuan, "Promotion leh relegation zinkawng thlengin, Scott hian ka thlawpna a dawng reng ṭhin a ni," tiin a coach hlui chu a thlah.