Match hmasaah Muguruza a chak

Wimbledon khelh ṭan niah Garbine Muguruza chuan hnehna a chang nghal. Spanish nula hian a khingpui Fiona Ferro chu 6-0, 6-1 a sawpin second round a inhlangkai.

Court Two-a inkhelah Muguruza hi a chungnung fal hle, 2017 champion hian 6-0, 5-0 in hma a hruai fal hman hial. Game khat chu hloh ve zeuh mah se minute 49 chhungin nuamsa takin a chak.

Seeded 11-na Mugu-ruza hian a match lehpekah chuan Lesley Pattinama Kerkhove a hmachhawn leh ang. Dutch nula hian first round inkhel dangah Svetlana Kuznetsova chu 6-3, 6-3 in a lo hneh ve bawk a ni.

Inkhel dangah beisei loh result kan hmu. Tun hma lama vawi hnih champion tawh Petra Kvitova chu Sloane Stephens lakah 6-3, 6-4 in a tlawm. Czech nula hian tun hma angin service a nei ṭha tawk lo a, tihsual a ngah bawk chu a tuar.

Stephens hian a match lehpekah chuan Kristie Ahn a hmachhawn leh ang. Ahn-i hian a khingpui Heather Watson chu a lo hneh ve thung a, inelna neih ṭan niah tualchhung nula Watson beiseina a tawp nghal.

Kumin Wimbledon-ah hian hmeichhe ranking sang pathum zinga pahnih Naomi Osaka leh Simona Halep te chu an inlan thei lo.