Messi-a'n record thar goal hnihin a lawm

Lionel Messi chuan Argentina tana inlan hnem ber record thar a siam, ram tana match 148 a khelh tlinnaah hian goal hnih khungin Bolivia lakah 4-1 in hnehna an chang - world champion vawi hnih ni tawh tan goal 75 a nei tling ta chiah bawk.

Nimin zing Copa America inkhel dangah Uruguay chuan Edinson Cavani-a penalty chhuih luh hmangin Paraguay 1-0 in an hneh ve bawk. Group A aṭangin Argentina, Uruguay, Paraguay leh Chile ten quarterfinal an lut.

Goal hnih chu
Arena Pantanal-a inkhelah Argen-tina lamin ball an chang hnem a, tla chiang tawh Bolivia laka khung turin an nghah rei pawh a ngai lo. Minute rukna lekah Papu Gomez chuan Messi siamsak khungin hma an hruai.

Bolivia goalkeeper Carlos Lampe-a'n Sergio Aguero leh Angel Correa te khung tur dansak mah se Messi erawh a dang thei lo. Barcelona captain hian box pawn aṭangin mawi takin keeper hi a 'chip' khum.

Chawlhlawk hmain Messi-a'n chiang zetin penalty a chhuih lut a, inkhel chawhnu lamah Erwin Saavedra chuan siphurh sut ṭhen ve mah se Inter Milan striker Lautaro Martinez-a'n chak nemnghehna leh an goal lina ni bawk a khung zui.

Hmabak Ecuador
Argentina hian quarterfinal-ah chuan Ecuador an hmachhawn zui dawn. An chak a nih chuan Uruguay leh Colombia inkhela chak zawk nen semifinal an khel zui leh dawn - final hma chuan Brazil nen an intawng dawn lo.

Lionel Scaloni enkawl Argentina hian inelna hrang hranga an match hnuhnung 17-ah tlawm an nei lo, coach Scaloni hian Bolivia an hneh hnuah hmabak an la ngah thu leh kawng zawh tur a la thui thu a sawi.

Kum 43 mi Scaloni chuan, "Eng team pawh hmachhawn an awlsam lo vek tih kan hriat a ngai. Tlawm loa kal tluan hi a lawmawm rualin a pawimawh ber erawh a ni lo, a pawimawh zawk chu nomawi kan chawi em, tih a ni," a ti.

Match 148
Argentina tana inlan hnem ber ni ṭhin chu Javier Mascherano a ni a, ram tan match 147 a khel. Tunah chuan Messi-a'n Barcelona tana a khelhpui record hi a khum a, goal 75 a khung pawh an ram record thar a ni zel.

Kum 2005 khan Messi hian ram tan senior match a khel ṭan. Budapest-ah Hungary an hmachhawn a, bench aṭanga luhtir niin khelmual a luh aṭanga minute khat pawh a liam hmain red card a hmu! Kut a thawh avangin hnawh chhuah a ni.

Ram tana a inlan ṭan danah duhthu a sam lo, amaherawhchu a theihna leh thiamna a san fal avangin hun ṭha pek chhunzawm a ni a, tunah chuan kum 34 mi ni tawhin rinrawl a la ni ring. Goal leh inlan hnem record hi a siam belh zel dawn.

A la tawk lo
Barcelona tan nomawi chawi theih a chawi kim a, mimal chawimawina pawh a hui fai vek. Mahse, Messi hian a football zin kawngah hlen chhuah loh a la nei a, chu chu ram tana nomawi chawi a ni.

Copa American final vawi thum bakah World Cup final vawi khat luhpui tawh mah se a vanduai zawkah an ṭang zel. Argentina hian Copa America 1993 hnu lama an nomawi hmasa ber an beisei leh mek.

Messi chuan, "Club tana hlawhtlinna hi a lawmawm, chumi tur chuan ka vannei ve bawk. Chutih rualin ram tana nomawi chawi theih chu thil châkawm bik a ni," a ti. Inelna an neih ṭan hma khan Argentina hlawhtlinna chanpui chu a duhthusam a nih thu a sawi ve bawk.