Man City tan Fernandinho khel zel dawn

Manchester City chuan an captain Fernandinho a contract chu kum khat dang atan an pawtsei a, kum 36 mi hi rinrawl ber ni tawh lo mah se a tawnhriat bakah a theihna hi inkhel ṭhenkhat atan a la ṭangkai hle.

Brazilian midfielder hian 2013 khan Shakhtar Donetsk aṭangin Man City hi a zawm. English club tan hian Premier League nomawi pali leh League Cup paruk a chawi tawh. Season hmasa khan Champions League final an thleng bawk.

Kum 36 mi Fernandinho chuan, "Ngun taka ka ngaihtuah hian hna hlen chhuah loh ka la nei. Chuvangin Etihad Stadium-ah hian ka la cham dawn, tun hma lama kan la hlenchhuah theih ngai loh chu tih puitlin ka duh," a ti.

Fernandinho hian season riat chhungin City tan hian match 350 a khel tling tawh a, goal 24 a khung. David Silva a chhuah hnuah captain nihna a chelh, midfield bakah a ṭul chuan tlarhnung laiah a khel ṭhin.

Captain a nih hnuah EPL leh League Cup a chawi a, amaherawhchu an duh ber UCL erawh an la chawi thei lo. Pep Guardiola kaihhruaina hnuaiah season tharah hian beiseina thar nen an khel leh ang.