Three Lions hâhum hmaah German ral a lian zo lo

Euro 2020 last 16 match nghah-hlelhawm bera chhal ngam chu England leh Germany intawng tur a ni a, ram pahnih hi kil tinah an inbuk tawk emaw tih mai tur a ni.

Thawhlehni zan khan Wembley Stadium-a fans 40,000 pungkhawm hmaah team pahnih an intawng ta ngei a, England-in 2-0 in hnehna an chang.

Raheem Sterling leh Harry Kane ten England tan goal an khung a, Germany-in a chhan letna tur an nei lo. Hun a tawp a, Gareth Southgate-a'n van lam hawiin a ban a phar a, a ngaihtuahnaah thil tam tak a awm tih a chiang.

Kum 55 hnua a vawi khat nan England-in knockout game-ah Germany an hneh ta.

Mi huaisen Southgate
England boss Gareth Southgate-a'n a formation hman a thlak fo a, Euro group stage match an khelh zawh hnuah pawh a naute khelh dan a la siksawi kual a, media lamin an coach demna an tichhuak nasa hle.

Mahse, he English coach hi a dinnaah a ding nghet tlat a, a ngaihdan tê lo chuan thutlukna a siam ngai lo. Germany lakah pawh mipui a barakhaih a, ṭum danga a formation hman ngai loh 3-4-3 a rawn hmang.

Tlarhnung laiah Kyle Walker, John Stones leh Harry Maguire an awm a, wing back angin Kieran Trippier leh Luke Shaw an awm bawk - defender panga an ni phawt. Midfield laiah Kalvin Phillips leh Declan Rice an inkawp thung - tlar hnung veng turin player pariat an awm a ni ber mai.

England midfield-a inkawp enin Kane-a'n chawmtu a nei ṭha tawk lo ang tih a hriatthiam theih a, mual sirah amah thlawp turin Bukayo Saka leh Sterling an awm.

English mipui hmuh châk Jack Grealish, Mason Mount, Phil Foden leh Jadon Sancho ten bench an luahlum.

An ṭan ta
Southgate-a player rem dan thlirin goal venhim hmasak a ngai pawimawh tih a chiang a, hun tawp hnaih lama nawr turin bench aṭanga luhtir tur player a nei ṭha tawk tih a inhria.

Germany coach Joachim Low erawhin Serge Gnabry bench-ah dahin a hmaa a chhawr rim loh Timo Werner a luhtir tih loh chu mak tih tura player thlak danglam a nei lem lo a, mahse, a thutlukna siamah a inchhir ngei ang.

Werner hian minute 32-na lekah Germany tana hmahruaina goal khungna remchang a nei a, mahse, a chhawr lo - Kai Havertz-a'n duhthusama ball a chhawpsak chu Jordan Pickford chauh hmachhawn chungin a pet goal thei lo.

Chelsea striker hian a thluak hmang se chuan 'chip' a fuh zawk tih a ngaihtuah thleng hmanin a rinawm a, mahse, hei tak hi Werner-a class tawk lohna an sawi chu a ni miau si.

He mi hma hian minute 10-naah Germany goal thunna remchang tura Leon Goretzka ball khalh lut chu Declan Rice-a'n a titlu a, yellow card chawiin goal tur a hum a tih theih.

Ka pu, ka lawm e!
England-in an duh danin first half an khelah a ngaih theih a - second half-a Saka thlaka Grealish a luh hnuah England inkhel a hmuhnawm sawt a, minute 75-naah Sterling-a'n goal a rawn khung ta.

Sawiselna tam tak kara Southgate-a rinna hlawhtu Sterling hian a pu rinna chu goal hmangin a chhâng lêt a, tun Euro-ah goal thum zet a khung tling ta - Kane-a man atana Tottenham Hotspur lama kal teltir tumtu Manchester City-in ngaihtuahna an seng nawn ang.

Germany an harh zawk a, Thomas Muller-a'n minute 81-naah German beiseina siam turin chance duhawm bik a nei. Sterling-a tihsual aṭanga ball kal zel hi Pickford chiah hmachhawn chungin Muller hian goal zawnah pawh a pet lo!

England-in Germany an hrem zui - Muller-a chance hlah aṭanga minute nga hnu lawkah Grealish hnen aṭanga a ball hmuh chu Kane-a'n goal a la khung thei reng tih pholangin a tauh lut a, striker thiam bik goal a ni.

Hun a tawp zui a, khel ṭha zawk leh goal chance ṭha hlah ve lo England an chak - chak an phû e.

Team ṭha tak hneh turin hun duhawm kan nei a, mahse, kan hun neih chu kan chhawr thei lo a ni. Long ball hmangin kan forward-te chawm tum ṭhin mah ila an tan a harsa a, kan diagonal pass-te lah beisei angin a thawk thei bawk si lo. Kan duh ang takin England kha kan hrem thei ta lo a ni.
- Manuel Neuer, Germany captain

Beiseina sang tak hnuaia kan khelh dan hian min tilawm a, kan khelh danah kan inchhuang hle tur a ni. Mahse, hetah hian kan tawp mai tur a ni lo - hei aia sang zawk kan beisei a, semifinal leh final khel turin Wembley Stadium-ah kan lo kir leh ngei ka beisei.
- Harry Kane, England captain

Ṭap tawh suh, Southgate!
Kum 1996 a ni a, a hmun chu Wembley Stadium a ni. European Championship semifinal-ah England leh Germany an inkhel a, extra time khelh zawh tawh hnu thleng pawhin chak zawk an awm thei lo. Penalty shootout hmangin chak zawk zawn a ni a, team pahniha a pet tura ruat player panga ve vein an pet goal vek - a tawpah Southgate a pen chhuah a ngai a, a pet goal lo!

Southgate-a mittui a tla a, coach Terry Venables-a'n a hnem a, a hnem zo lo. England fan-ten 'It's coming home' tih hla sa mah se European champion an nih an beiseina chu a thamral - Southgate vang a ni. Kum 2021 a her chhuah meuh chuan Southgate-a'n player a nihna anga a tihsualte thai bo turin chance duhawm a nei zui a, chu hun duhawm chu lungsi taka kuah chungin a thuhnuaiah a dah ta.

Southgate chuan, "Big screen lam ka hawi a, David Seaman ka han hmu. Kum 1996-a ka khelhpuiten keimah vanga final an khel thei ta lo kha chu thlak danglam theih a ni tawh lo a, keimahah hian kha hun tawn hrehawm kha chu a cham reng tawh ang.

"Mahse, ka lawmna em em chu mipuite tana hriatreng tur hun hlimawm kan hnutchhiah hi a ni a, Rome khawpuiah tih leh kan tum ang," a ti a, Ukraine nena quarterfinal an khelh tur a thlirlawk der tawh. England hian quarter-final-ah Ukraine an hmachhawn dawn a, Andriy Shevchenko enkawl team hi an hneh thei a nih chuan Czech Republic leh Denmark inkhela chak zawk chu semifinal-ah an tum leh thei dawn a ni.

World Cup (2018) zawh hnu aṭang khan team langsar hmaa kan theihna hi rinhlelh a ni fo ṭhin. Tawnhriat nei ṭha Germany ang team kan tum chuan ball pass leh possession thlengin an thuhnuaiah an dah thei dawn tih kan hria a, Kroos khan game siam a tum dawn tih kan hria a, dawhtheih a ngai dawn tih pawh kan hria. Ka lawmna em em chu chak kan phur em em reng a, zaninah khan kan thluak hmangin kan khel a ni.
- Gareth Southgate, England coach