Mangṭha Joachim Low

England hneh loa European Championship aṭanga an tlak tak avangin kum 15 chhung inkawp tawh Germany leh Joachim Low te an duh aia hmain an inṭhen a ṭul ta. Die Mannschaft-in FIFA World Cup nomawi chawi puitu coach Low hi Euro C'ship nomawi nen thlah an duh a, an tlin ta lo.

Germany chanchinbu lar Bild chuan Toni Kroos-a'n ram tana inkhelh a chawlhsan tur thu an ziak. Munich nitin chanchinbu Abendzeitung-in Thomas Muller pawhin Kroos a hnung a zui an rin thu an sawi a, nimin tlai thleng khan thuchiang a la awm lo thung.

Low hi Bayern Munich treble champion puitu Hansi Flick-a'n a thlak dawn a, September 2, zan dar 12:15-a Liechtenstein an hmachhawn hun aṭangin Flick-a hun hi a inṭan ang.

Tu nge Low?
Germany enkawl rei ber record siamtu Joachim Low hi coach ṭha zinga chhiar tel theih ni mah se a inkhelh hunlai chuan player vantlang a ni a, ram tan senior team-ah a khel pha lo.

February 3, 1960 khan Schonau im Schwarzwald, West Germany-ah a piang a, hetih hunlaia 2. Bundesliga club SC Freiburg-ah kum 1978 khan football career a ṭan.

Low hi feet ruka sang a ni a, attacking midfield-ah khel ṭhinin West Germany Under 21 team tan vawi li a inlan. Club hrang hrang VfB Stuttgart, Eintracht Frankfurt leh Karlsruher SC tan te a khel a, Switzerland club FC Schaffhausen leh FC Winterthur tan a khel bawk.

Coach tura duan
Low hi FC Winterthur-a (1992-94) player anga awm laiin youth team a enkawl tawh a, player-coach angin FC Frauenfeld a enkawl zui bawk. Kum 33 chhoah Low hian team a enkawl tawh tihna a ni a, bul a ṭan hma hle.

VfB Stuttgart-in head coach Rolf Fringer thlawp turin 1995–96 season khan assistant coach atan an lalut a, Fringer hian Switzerland national team a zawm san avangin manager lailawk atan August 14, 1996 khan lakluh niin manager nghet ni zuiin May 21, 1998 thleng a enkawl.

Low hian Turkish club ṭha Fenerbahce a enkawl a, Germany-ah let lehin Karlsruher SC a enkawl a, Turkey-ah kal lehin Adanaspor a enkawl hnuin Austria a pan. German manager hian Tirol Innsbruck chu 2001–02 Austrian Bundesliga-ah a champion pui a, sum lamah club a tlak chhiat avangin a hna a chan.

Austria Wien a enkawl leh a, Europe leh Austrian Cup-a a chet ṭhat tawk loh avangin season khat a hmang tluan lo a, club a chhuahsan hian an ram league-ah chuan pakhatna an la ni.

Germany coach
Euro 2004-ah Germany an che ṭha tawk lo a, head coach Rudi Voller thlak nan Jurgen Klinsmann lakluh a ni a, an hunlaia player ropui ve ve an ni. Klinsmann hian coaching zirnaa lama hmelhriat Low chu assistant coach atan a lalut a, attacking football an tuipui ve ve vang a ni ber.

Klinsmann leh Low te hian 2005 FIFA Confederations Cup leh 2006 FIFA World Cup-te an hmachhawn dun a, Confederations Cup-ah pathumna ni mah se match ngaah goal 15 an khung a, goal khung tam ber an ni. 2016 World Cup-ah inelna thlengtu Germany an hmuhnawm a, semifinal-ah Italy lakah vanduai mah se an phu angin pathumna erawh an ni tho.

World Cup zawhah Klinsmann-a'n contract a pawhsei loh avangin Low hian Germany a enkawl zui a, assistant manager atana a hman chu tuna amah thlaktu tur Hansi Flick hi a ni. Germany a enkawl hnua Low chanchin chu khawvelin a hria a, a ropui a thlawt.

Germany-in Euro 2008 final an thleng nghal a, Spain lakah an vanduai. 2010 World Cup semifinal-ah bawk an tla a, Uruguay hnehin pathumna an ni. Euro 2012-ah semifinal lutin Italy an hneh lo a, World Cup 2014-ah an hun a inher chhuak ta.

Belo Horizonte-ah inelna thlengtu Brazil 7-1 in an sawp a, final-ah Lionel Messi telna Argentina chu 1-0 in an hneh. Germany hian Euro 2016 semifinal-ah inelna thlengtu France an hneh lo a, 2017 Confederations Cup-ah champion leh mah se ngai an awh tawh lo.

A hun a pel ta
World Cup 2018-ah Germany chu champion nawn tura rinkai ni mah se group stage an patlang lo a, table mawngphahah awmin an chungah Sweden, Mexico leh South Korea te an awm. Low-a'n hun harsa chinfel a tumna lamah thutlukna atthlak a siam a, player ṭha pathum Thomas Muller, Mats Hummels leh Jerome Boateng te a koh tawh loh tur thu a puang.

Inelna thar Nations League-ah France leh Netherlands te nen awm kawpin chak an nei lo. Season hnihnaah Germany-in semifinal luh theihna hun ṭha nei mah se draw chiah an mamawhna inkhelah Spain lakah 6-0 in an chak lo.

Low-a'n team thar din tum mah se a thei lo tih a chiang a, World Cup qualifiying round-ah North Macedonia an mualah 2-1 in an hneh lo leh bawk. Germany coach mangangin Euro 2020-a insiamṭhat hman beiseiin Muller leh Hummels te a ko let a, thutlukna a siam tlai hret.

Euro 2020-ah Germany hian World champion France leh European champion Portugal te awmna group aṭangin knockout stage lut mah se Les Bleus an hneh loh bakah Hungary nen an inhnehtawk. Match zawng zawng hi an muala khelh a nih bawk avangin an khelh danah lawmna tur a awm lo.

Low leh Germany ten hun duhawm tam tak hmang dun mah se Wembley Stadium-ah England hneh loin an tla a, an tawp khar dan a fuh tak loh avangin German coach hi a hlut tur angin a hlu thei dawn ta lo a ni.

Pawi kan ti takzet a, tun aia ṭha hi kan beisei. Team chhungah beiseina a awm. Amaherawhchu hetiang inkhel pawimawhah chuan chance ṭha neih hlah loh a ṭul a, vanduaithlak takin goal kan khung thei lo. Tumah sawisel ka tum lo a, German mipui rilru naa kan siam hi pawi ka ti. Player-ten sawi tur an hre lo.
- Joachim Low, Germany coach

Joachim Low-a record
VfB Stuttgart
• UEFA Cup Winners' Cup runner-up: 1997–98
• DFB-Pokal: 1996–97
• DFB-Ligapokal runner-up: 1997

Tirol Innsbruck
• Austrian Football Bundesliga: 2001–02

Austria Wien
Austrian Supercup: 2003

Germany
• FIFA World Cup: 2014; third place: 2010
• FIFA Confederations Cup: 2017
• UEFA European Championship runner-up: 2008

Mimal Chawimawina
Sport Bild German Sports Manager of the Year: 2010
German Football Man of the Year: 2011, 2014
German Football Manager of the Year: 2014
FIFA World Coach of the Year: 2014
World Soccer Awards Manager of the Year: 2014
IFFHS World's Best National Coach: 2014, 2017
L'Équipe Sports Manager of the Year: 2010
European Coach of the Year—Alf Ramsey Award: 2014
FIFA World Cup Dream Team: 2014
Silbernes Lorbeerblatt: 2010, 2014
Bundesverdienstkreuz am Bande: 2010
IFFHS World's Best Man National Coach of the Decade 2011–2020