Wimbledon match hmasa berah Federer a vannei

Wimbledon khelh laiah Roger Federer-a'n hnehna chang turin vanneihna a mamawh tel. Vawi riat a champion tawhna hmunah Federer hian Adrian Mannarino chu 6-4, 6-7 (3-7), 3-6, 6-2 in a hneh hram.

Thawhlehni zan inkhel dangah seeded pahnihna Daniil Medvedev pawhin fiahna a paltlang, world number 2 hian Jan-Lennard Struff lakah set hloh ve mah se a tawpah erawh a dingchang zawk a ni.

Roger tan a hautak
A hmun ngai, Centre Court-ah ngei mai khan Federer a lo kir a, a hmuna entu mipui lawm a hlawh hle. Amaherawhchu Swiss star tan thil a awlsam bik lo, set hnih ve ve an lak hnuah a khingpui Mannarino a inkhel zawm thei lo.

Set linaah Federer hian 4-2 in hma a hruai fal a, a kum 33 tlin cham lawmtu Mannarino hian a khup a tihliam. World number 41 hian set ngana a khel chhunzawm thei lo a, hliam vanga court a chhuahsan dawn laiin entu lamin zahna an lantir.

Grand Slam vawi 20 champion tawh Federer hian a match lehpekah chuan Richard Gasquet a hmachhawn leh dawn. First round inkheld angah Gasquet hian Japanese player Yuichi Sugita chu 7-6, 6-4, 6-2, 6-1 in a lo hneh ve thung.

Kum 39 mi Federer chuan, "Hetianga hnehna chan hi chu ka duh dan a ni ngai lo. Inkhel tluan thei loa awm hrehawmzia hi kei pawhin ka hriat tawh a nih avangin Mannarino ka tuar pui hle," a ti. Grass court inelna hmachhawn tur hian tun dinhmunah a taksa a ṭhat tawk thu a sawi bawk.

Medvedev a chak
Hard court-a inkhel thiam Daniil Medvedev pawhin grass-ah hnehna a chang. Russian star hian German tlangval Jan-Lennard Struff chu 6-4, 6-1, 4-6, 7-6 (7-3) in a hneh; second round-ah chuan Carlos Alcaraz leh Yasutaka Uchiyama inkhela chak zawk a tum leh ang.

Medvedev hian tun hmain All England Club-ah hian third round a la paltlang ngai lo, kuminah hian seeded pahnihna pek niin beiseina a nei sang ve hle. Inkhelh harsa a tihna hmun French Open-ah quarterfinal a thlen theih avangin Wimbledon a beisei sang hi a mak lo.

Champion tura rinkai zinga mi Alexander Zverev pawh a chak. World number 6 hian Tallon Griekspoor lakah 6-3, 6-4, 6-1 in hnehna a chang. German tlangval hian a major title hmasa ber tur a la nghak ve zel.

Mipa singles huangah chak tura rinkai an chak deuh zel - Diego Schwartzman leh Denis Shapovalov ten hnehna an chang. Rinkai zinga mi Alex de Minaur erawh world number 50 Sebastian Korda hmaah 6-3, 6-4, 6-7 (5-7), 7-6 (7-5) in a tlawm thung.