Netherlands coach a bang

Euro 2019 aṭanga an tlak hnuah Frank de Boer chu Netherlands coach a nihna aṭangin a bang. Dutch football federation (KNVB) chuan a hmun ruak luah tur hi an la puang lo.

Kum 51 mi De Boer hian nikum September thla khan an ram team enkawl hna hi a thawk ṭan. Ronald Koeman-a'n an ram team enkawl aia Barcelona enkawl a duh zawk avangin a hmun ruak a luah.

De Boer kaihhruaina hnuaiah Netherlands hi Euro 2020 group C hmahruaitu an ni a, last 16-ah Czech Republic nen intawngin chak zawk tura rinkai an ni. Mahse, defender Matthijs de Ligt hnawhchhuah a nih avangin 2-0 in an chak lo.

Dutch football federation (KNVB) chuan thuchhuah siamin, "Frank de Boer-a'n a hna enkawl chhunzawm lo turin thutlukna a siam a, a contract hi pawhsei a ni lo ang. Inremna kan neih danah quarterfinal kan thlen chuan contract chungchang sawi ṭhat a ni ang, tih a ni sa bawk," an ti.

De Boer hi team enkawl kawngah a tluang vak lo. Tun hmain Crystal Palace chu ni 77 chhung chauh a enkawl tawh a, Inter Milan pawh ni 85 chhungin match 15 chauh a kaihruai tihin a hna a lo tawp tawh bawk.