October 17 aṭangin T20 World Cup

International Cricket Council (ICC) chuan ICC World Twenty20 chu UAE leh Oman-ah khelh a nih tur thu an tichiang.

T20 World Cup hi ruahmanna hmasaah chuan kum 2020 khan Australia-a khelh tur a ni a, Covid-19 vanga 2021-a sawn a nih hnuah inelna hmun pawh India rama khelh turin ruahmanna an siam. Amaherawhchu Covid-19 vang thoin inelna hi sawn leh a ṭul a, UAE leh Oman-ah khelh a ni dawn ta a ni.

Kumin T20 World Cup hi October 17 - November 14 chhungin khelh a ni dawn a, team 16 an inlan dawn. Team 16 khel turte hi ram pakua, cricket thiam ram 10 - India, Pakistan, Australia, England, South Africa, New Zealand, West Indies, Afghanistan, Sri Lanka leh Bangladesh niin, anni bakah qualifier aṭanga tling ram paruk an tel dawn.

Ram parukte hi Netherlands, Papua New Guinea, Ireland, Namibia, Scotland leh Oman te an ni dawn. ICC chuan, "Inelna hi India rama khelh tum a ni a, amaherawhchu Covid-19 second wave vangin sawn a ṭul ta a ni. BCCI erawh inelna thlengtu an ni chhunzawm dawn a, inelna hi stadium pali Dubai International Stadium, Sheikh Zayed Stadium, Sharjah Stadium leh Oman Cricket Academy Ground te khelh an ni ang," tiin thuchhuah an siam.

T20 inelna hnuhnung ber chu kum 2016 khan neih a ni a, India-in an an thleng. Final hi Eden Gardens, Kolkata-ah khelh a ni a, West Indies-in England hnehin an champion.