Hliam vangin Serena inkhel tluan thei lo

Serena Williams chu hliam vangin Wimbledon aṭangin a inhnukdawk. American star hian a match hmasa berah Aliaksandra Sasnovich a hmachhawn a, set khatnaah game thum ve ve an lak hnuah Serena hi a khel tluan thei lo.

Mangṭha Serena
Minute 39 chauh an inkhel hman a, court-ah Serena hi ṭhingṭhiin a kun ngaih a, a ke ding lam hliam vangin a inkhel chhunzawm thei ta lo. Hreh tak chungin mittui nen Centre Court a chhuahsan.

Kum 39 mi Serena chuan, "Hliam vanga inhnuhdawh a ngai hi a hrehawm takzet. Ka tan chuan Centre Court hi engkim a ni tawp mai, inkhelhna nuam leh hmingthang buatsaihtute tluang taka hna thawk chhunzawm turin duhsakna ka hlan," a ti.

Seeded parukna Serena hian a major title 24-na la tur chuan a nghah leh rih a la ngai dawn. Tun ṭumah hian Margaret Court-i record (24 titles) nihrual theih inbeisei mah se a suangtuahna chu boruakah a thamral leh rih.

Vawi 90-na
Wimbledon vawi nga champion tawh Venus Williams chuan Mihaela Buzarnescu lakah 5-7, 6-4, 3-6 in hnehna a chang a, American star hian Grand Slam inelna vawi 90 a hmachhawnnaah bul a ṭan fuh.

Venus hi kum 41 mi a ni tawh, grass court inelna lian bikah ringawt pawh hian ṭum 23 a inlan tling ta chiah. A vanglai liam tawh mah se player ṭha a la ni reng a, set thumnaah phei chuan fal takin a la kal thei.

World number 111 Venus hian hliam vangin kuminah inelna a la hmachhawn tam lo, match 10 a khel tling chiah. Second round-ah chuan Ons Jabeur a hmachhawn leh ang - Tunisian player hi seeded 21-na a nih phak avangin thil a awlsam lo ang.

Number 1 a chak
Champion tura rinkai ber Ashleigh Barty-i'n fiahna a hmachhawn a, harsa takin a paltlang. World number 1 hian darkar khat leh minute 44 chhungin Carla Suarez Navarro chu 6-1, 6-7 (1-7), 6-1 in a hneh.

Chak lo mah se Navarro-i'n mipui lawm a hlawh. Spanish player hi cancer dam leh a ni a, a natna a hneh hnua a match hnih khelh lehna chiah a ni. A chak loh hnua Centre Court a chhuahsan dawnah entu mipui lamin zahna chibai bukin an lo ding.

Inkhel dangah world number 1 hlui Karolina Pliskova pawhin hnehna a chang, a khingpui Tamara Zidansek lakah set hmasa berah 5-2 in hnufual hman mah se 7-5, 6-4 a tho chhuak lehin hnehna a chang ve bawk.