Mercedes-in car tih chak an tum

Formula 1 team champion Mercedes chuan season kal laiah beisei an phak lo a, technical boss James Allison chuan hmasawn turin an car an tih chak zual theih ngei a beisei thu a sawi chhuak.

Mercedes hian season hmasa kha an thunun hneh hle, intlansiak 17 zinga 13 zetah hnehna an chang thei. Mahse kuminah erawh inelna vawi riat an neih tawh zinga pangaah Red Bull an chak a, Mercedes hian vawi thum hnehna an chang thung.

Styrian Grand Prix an tlan zawh takah khan Lewis Hamilton chuan, "An chak zawk, zep tur a awm lo," tiin Red Bull car a chak zawk thu a sawi a, team principal Toto Wolff chuan an insiamṭhat nghal tur thu a sawi ve bawk.

Technical boss James Allison chuan, "Intlansiak hmabak kan neihah hian insiamṭhatna tur kan nei nual a, a bik takin car a chak zual theih nan hmalakna kan nei, a taka hmuh a châkawm tawh hle," a ti.

Tunkar tawp hian Styrian Grand Prix an tlanna hmun ngaiah bawk Austrian Grand Prix an tlan leh dawn. Driver championship lamah Max Verstappen hi champion lai Hamilton aiin point 18-in a sang fal mek a, inelna hmuhnawm a beisei leh ngam ang.