Bucks chak loh niah Antetokounmpo a inhliam

NBA Eastern Conference finals khelh laiah Milwaukee Bucks leh Atlanta Hawks an inkhel tawk hle. Nimin zing khan Atlanta lamin 110-88 in hnehna an chang a, best of seven series-ah team pahnih hi 2-2 in an intluktawk mek.

Chak lo Bucks hian ke rek hliam vangin Giannis Antetokounmpo an chan. July 2, Zirtawpni zingah game 5 an khel zui dawn a, inkhel pawimawhah an player ṭha hi an chhawr thei dawn em, tih a chiang ta lo.

Hawks an chak
Anmahni mualah ngei Atlanta Hawks an chetsual avangin an tan tluk nawn a thiang lo a, game 4-ah chuan a tir aṭangin thapui an thawh nghal; chawlhlawk an hman laiin point 11 zetin an sang fal hman a, dinhmun an sawhnghet hle.

Quarter thumnaah Bucks an rawn kang ve leh deuh a, mahse point 14 neitu Antetokounmpo a inhliam, a khel zui thei lo. Greek tlangval a chhuah hnuah Hawks an pawr zual - point 10 leka an sanna chu 25 zetah an tizau nghal.

Atlanta tan hian hliam vangin Trae Young a inlan thei bik lo a, mahse point 21 hmutu Lou Williams leh Bogdan Bogdanovic (20 points) te an che ṭha a, player dang pathumin point 10 chuang an neih bawk avangin chak phu zawk an ni.

A chiang lo
NBA Most Valuable Player vawi hnih ni tawh Antetokounmpo a awm chuan Bucks hi team ṭha an ni, ani a awm loh erawh chuan an tan kawng a harsa tawh ṭhin, a chawlh chen tur an la hriat loh avangin amah leh team hma hun a chiang lo.

Bucks coach Mike Budenholzer chuan, "Boruak aṭanga a tlak khan a ke lam a na tih ka hria, a bak chu sawi theih ka nei lo," tiin a player hliam chungchang a sawi. Bucks forward PJ Tucker chuan an chak loh chhanah chhuanlam siam a rem loh thu a sawi ve bawk.

Hnehna changtu Hawks coach Nate McMillan chuan, "Team pumpui thawhrah a ni, mimal a innghat thei kan ni ve lo. Player zawng zawng an pawimawh vek a, kan mamawh hunah basket an nei thei zel kha a pawimawh lai chu a ni," a ti.