Argentina leh Messi hun a inher chhuak dawn em?

South America ram tana football inelna sang ber Copa America chu Brazil-ah khelh a ni mek a, June 13 khan khelh ṭan niin July 10-ah khelh zawh a ni dawn. Group match khelh zawh a ni ta a, champion tura rinkai pahnih Argentina leh Brazil te chu an group-ah hneh loh nei loin pakhatna ve ve an ni.

1993 daih
Football khelh thiam ram Argentina hi football ram ropui zinga sawi ni mah se Copa America-a an campion chu kum 1993 daih tawh kha a ni. Ecuador-a inelna neih ṭum khan La Albiceleste hian final-ah Mexico 2-1 in a hnehin an champion. Final-a goal hnih khungtu hi Gabriel Batistuta a ni a, Italian club Fiorentina legend Batistuta hi tunah chuan kum 52 mi a ni tawh.

Argentina hian khawvel player ropui ber zinga mi Lionel Messi bakah player ṭha dang Javier Zanetti, Juan Sebastian Veron, Pablo Aimar, Juan Roman Riquelme, Hernán Crespo, Hernán Crespo, Javier Mascherano, Carlos Tevez leh Martín Demichelis te nei zui mah se nomawi an chawi tawh lo.

Beiseina thar
Argentina hian group stage-ah team ṭha bik an ni tih an pholang a, match hmasa berah Chile nen an inhnehtawk hnuin match hnuhnung pathumah an chak vek. La Albiceleste hneh zingah hian champion thei tura ngaih zinga mi Uruguay pawh an tel.

Uruguay-ah hian La Liga-a Atletico Madrid champion puitu Luis Suarez leh Manchester United striker Edinson Cavani te an kawl chungin goal an chhuah lo. Lionel Scaloni-a'n tlarhnungah Cristian Romero leh Nicolás Otamendi te a inkawptir. Romero hi Atalanta-a khel a ni a, he club-a khel player-te hi Euro C'ship lamah pawh an che ṭha. Manchester City defender hlui Otamendi erawh a chanchin sawi nawn a ngai lo a, Benfica tan a khel mek.

Mual sirah Udinese right back Nahuel Molina leh Sevilla left back Marcos Acuna te an dah thei a, Aston Villa goalkeeper Emiliano Martínez a la awm bawk. Europe club ṭhaa khel tlarhnungah an rem theih avangin group stage-a goal hnih chauh an chhuah hi a mak lo.

Messi telna
Argentina tana chanchin ṭha chu Lionel Messi a che ṭha hi a ni a, Barcelona forward hian goal thum khung tawhin top scorer a ni mek. Hei chauh hi a ni lo, match li an khelh tawhah Messi hi ṭum thum man of the match-a thlan a ni.

Messi thlawptute hi player ṭha tho an ni a, a ṭhianpa Sergio Agüero bakah Inter Milan chhuanvawr Lautaro Martínez te an nih bawk avangin an khingpui tlarhnung tan chuan mangchhia thlen thei tur an ni hrim hrim.

Chutihrualin inelna thlengtu Brazil an awm miau avangin Argentina tan nomawi chawi hi a la harsa dawn. Selecao hi Neymar a telna a ni a, tun hnaiah Argentina aiin record an nei ṭha zawk.

Copa America thlir ṭhinte tana thu lawmawm erawh ram pahnih hi final-ah chauh an inhmachhawn thei dawn a, July 11, Pathianni zing dar 5:30-a team pahnih hi an inhmachhawn thei ngat a nih chuan 'Dream Final' a ni ngei ang le.

Quarterfinal Fixtures
July 3, Inrinni
Peru 02:30 AM Paraguay
Brazil 05:30 AM Chile
July 4, Inrinni
Uruguay 02:30 AM Colombia
Argentina 06:30 AM Ecuador