Ukraine 2-1 Sweden : Shevchenko hote khingpui tur England

Ukraine substitute Artem Dovbyk chuan extra time-ah pawh hun pek belhah ram tana a goal hmasa ber a khung a, player 10-a khel Sweden 2-1 in an hneh.

Andriy Shevchenko hoten Euro quarterfinal an lut a, England nen an inhmachhawn dawn. Ukraine hian 2006 World Cup-ah quarterfinal a thleng tawh a, tun hi inelna liana quarterfinal an thlen lehna hmasa ber a ni.

Inkhel hmuhnawm
Hampden Park, Glasgow-a inkhelah hian football hmuhnawma tel tura an sawi chu a tel vekah a ngaih theih. Goal thum a lut a, crossbar leh goal ban pet per a ni a, red card phawrh a ni bakah extra time khelh a ni.

Sweden leh Ukraine ten attacking football an khel a, Oleksandr Zinchenko goal hmangin Ukraine-in minute 27-naah hma an hruai. Sweden-in Emil Forsberg hmangin minute 43-naah siphurh an sut.

Second half-ah inkhel nung tak hmuh a ni a, goal erawh a lut lo. Extra time khelh a ni a, team ṭha zawka ngaih Sweden defender Marcus Danielson chu minute 98-naah hnawhchhuah a ni.

Player 10-a khel chungin Sweden an ṭang tluan teuh a, amaherawhchu injury time-ah Manchester City wing back Zinchenko cross chu Artem Dovbyk-a'n goal-ah a chantir a, 2-1 in inkhel a tawp.

Ngaihnawm
Sweden-in group match hnuhnung berah Poland 3-2 in an hneh a, he inkhelah point thum an hmuh avang hian Ukraine hi an tling hram. Robert Lewandowski hote hi chak se chuan pathumna ti ṭha pali zingah an tel ang a, Ukraine an tla ang.

Shevchenko hoten beiseina siamtu Sweden lakah zahngaihna an lantir lo a, Euro 2020 aṭangin an pet chhuak. Ukraine coach Shevchenko chuan, "Team pahnih chak duhin kan inkhel a, inkhel hmuhnawm tak phochhuah a ni. Kan khelh dan leh player-te inpekna thlir khan kan team khan ram pum ṭan hlawh kan phu," tiin a sawi.

Sweden midfielder Emil Forsberg chuan, "Team ṭha zawkah kan inngai a, a chak lo zawka kan ṭang hi a na hle a ni. Ṭul loah goal kan chhuah a, chu chu kan tuar ta a ni," tiin a sawi.

Player inlante
Sweden: Olsen; Lustig (Krafth 83), Lindelöf, Danielson, Augustinsson (Bengtsson 83); S Larsson (Claesson 97), Olsson (Helander 101), Ekdal, Forsberg; Kulusevski (Quaison 97), Isak (Berg 97)
Ukraine: Bushchan; Karavaev, Zabarnyi, Kryvstov, Matviyenko; Sydorchuk (Bezus 118), Stepanenko (Makarenko 94), Zinchenko; Yarmolenko (Dovbyk 106), Yaremchuk (Besedin 91; Tsygankov 101), Shaparenko (Malinovskyi 61)