Leicester-in Patson Daka an la lut

Euro khelh mek ni mah se Leicester City bazar-na a dal lo a, Premier League club hian striker sawi hlawh Patson Daka chu RB Salzburg aṭangin an lalut.

Kum 22 mi striker hian King Power Stadium-ah kum nga chhung khel turin contract a ziak a, a man zat hi pound maktaduai 22 bawr vel nia ngaih a ni.

Liverpool nen pawha sawi zawm ni hman Daka hian season hmasa khan Austrian Bundesliga-ah match 28 khelin goal 27 a khung a, top scorer a nih bakah Bundesliga Player of the Season a ni bawk.

Zambia tan vawi 25 inlana goal sarih khungtu hian an ram club Kafue Celtic leh Power Dynamos tana a khelh hnuin kum 2017 khan Austrian second division club Liefering a zawm a, hemi kum vekah hian Salzburg zawm mah se Liefering lamah hian loan bawkin a kir.

Salzburg tana a khelh hnuah a hming a chher chho a, season hman zawh takah khan inelna hrang hrangah match 42 khelin goal 34 a khung a, assist vawi 12 a nei thei.

Kum 2017-a Confederation of African Football's Young Player of the Year chawimawina dawngtu chuan, "Leicester hi nomawi chawi duha inelna hmachhawn an nih avangin ka tan chuan kalna tur hmun tak a ni.

"Leicester hi league nomawi an chawi aṭang khan ka ngaihven ṭan tawh. A awlsam lo ang tih ka hria a, mahse, ka hmaa chona inchhawp hmachhawn tur hian ka inpeih tawh a ni. He club tan hian engtiklai pawhin ka theihna ka hlan ang," tiin a sawi.