A tawp a tawpah Man United-in Sancho an la dawn ta

Borussia Dortmund-in nimin khan thuchhuah an siam a, Jadon Sancho chungchangah Manchester United nen inremna an neih thu an puang.

Man United leh Sancho hi kum li chhung sawi zawm an ni tawh a, nikum nipui bazar kha an inhnaih ber ṭum a ni a, English club hi an beidawng tawha a ngaih theih hnuah kuminah a hlawhtling.

A tlawm lo
Manchester United-in Sancho manah hian pound maktaduai 73 (€85m) an pek a ṭul dawn a, hetah hian agent fee a tel lo. Sancho man hi a chet ṭhat dan a zirin pound maktaduai ngaa pung chho thei tur a ni a, chutihrualin a pun belh dan erawh a harsa dawn niin an tarlang.

Kum 21 mi Sancho hian kum nga atan contract a ziak a, medical test la hmachhawn dawn mah se engmah harsa tur a awm tawhin a lang lo.

A chiang e
Borussia Dortmund CEO Hans-Joachim Watzke chuan, "Sancho chungchangah Mancheser United nen inremna kan nei. Keini chuan chelh kan duh a, Jadon-a'n chhuah a duh thung," tiin Man United-in Sancho an lak tur thu a tichiang.

Watzke chuan sawi chhunzawmin, "Kan inremnaa Sancho man hi kan lawmna a ni pha lo a, a chhuak tur hi pawi kan ti hle," tiin English winger-in chhuah a duh avanga an inhnuhhniam thu a sawi.

Tu nge Sancho?
Sancho hi March 25, 2000 khan Camberwell, England-ah a piang a, English rawlthar duhawm Reiss Nelson te nen naupan lai aṭangin an inkawm ṭhin.

London-a piang a nih avangin a naupan laiin Chelsea ṭantu a ni a, a player ngaihsan pawh Frank Lampard leh Ronaldinho te an ni. Kum sarih lek a nihin Watford a zawm a, kum 14 a nihin Manchester City zawmin a man hi £66,000 niin £500,000 thlenga sang chho thei tur a ni hial.

July 2017-ah Man City-in season ṭan hmaa an zin chhuahnaah an hruai tel lo a, khelhna hun chungchangah club hruaitute nen an inrem theih loh avangin contract thar a ziak duh lo.

August 31, 2017-ah Borussia Dortmund-in Sancho an lalut a, German club hian first team-a khelh an tiam bakah a manah hian pound maktaduai 8 an seng ngam. English winger hi Bundesliga-ah a hlawhtling a, kum li chhungin match 104 khelin goal 38 a khungsak.

Engtin zel?
Manchester United-in out and out winger an nei lo a, hemi a nih avang hian Sancho manah sum an seng huai. English winger hi a khelh dan thlirin club legend Cristiano Ronaldo, Ryan Giggs leh George Best te hnungzui thei tura ngaih a ni.

Sancho hi Bundesliga player ṭha ber zinga mi a ni a, chutihrualin Euro 2020-ah erawh England team-ah hmun pawimawh a chang pha lo. Manchester United-in Tlumtea thlira an thlir hian Sancho hian match li an khelh tawh aṭangin ṭum khat chiah a la inlan a, minute ruk chauh a la khel a ni.