Djokovic a chesual duh lo

Wimbledon champion lai Novak Djokovic a chesual duh lo, harsatna lian tham tawk loin Kevin Anderson a hneh a, third round a inhlangkai. A match lehpekah chuan Andreas Seppi hnehtu Denis Kudla a hmachhawn leh ang.

Nilaini zan second round inkhelah Andy Murray chu ropui takin a inlar bawk. Tualchhung tlangval hian Oscar Otte nen set nga zet an khelh hnuah hnehna a chang a, a hmuna inkhel entu mi 7,500 ten an lawmpui hle.

Novak a ṭha
Player pahnih hi 2018 Wimbledon final-ah khan an lo intawng tawh, grass court-a inkhel thiam ve ve an nih avangin an fimkhur dun hle. A tir aṭangin player ṭha Novak a danglam a, darkar khat leh minute 44 chhungin 6-3, 6-3, 6-3 in a chak.

Serbian tlangval hi a service a ṭha tawk hle, a khingpui ball vuak a lo hlap let thei em em a, a rilru a paukhauhin a zam eih lo tih a lang. Nidanga unforced errors a neih hnem ṭhin tawh a zia ta hle - Anderson lakah hian vawi ruk chauh a nei.

Set khatnaah a khingpui service vawi khat a chhuhsak a, set hnihnaah vawi hnih chhuhsakin set hnuhnung berah ṭum khat a laksak leh bawk. Match hmasa zawkah bul ṭan fuh tawk lo mah se tun ṭumah chuan duhthusama ṭhain a khel.

Wimbledon champion lai Djokovic chuan, "Ka khelh danah ka lungawi hle, ka beisei phak baka ṭhain ka khel chhuak. Inrintawkna chu ngah viau mah ila duh ang thlapa khelh hi a harsa ṭhin, tun ṭuma mi chu duhthusam a ni e," a ti.

Murray a tlawm lo
Darkar thum leh minute 53 chhungin set nga an khel a, kum 34 mi Murray chuan 6-3, 4-6, 4-6, 6-4, 6-2 in hnehna a chang. Britain tlangval tan hun rei tak chhunga set nga a khelh lehna hmasa a nih avangin a hnehna chan hi a hlu bik ngei ang.

World number 1 hlui hi hliam vangin a buai rei ta hle, tennis khelh chawlhsan tur angin lang hman hial mah se tunah chuan a inkhel pangngai leh ta viau, tun hma ang kha la phak rih lo mah se a thlen chin hi a tan lawmna tur a tling.

Grand Slam vawi thum champion tawh Murray chuan, "Mipui lam aṭangin puihna ka dawng ṭha em em a, min ti paukhuah zualtu an ni. A nihna takah kha chuan inkhel laihawl vel kha chu a hrehawm, a tawp erawh hlimna hlir a ni," a ti.

Third round-ah chuan Murray hian seeded 10-na Denis Shapovalov a hmachhawn leh ang. Canadian tlangval hian a match hmasa berah set nga a khel a, second round-ah erawh a khingpui tur hliam vanga a inlan theih loh avangin inkhelh hah ngai loin a tlang.

Court a nal?
Wimbledon khelhna hmunpui leh an ngaihhlut ber Centre Court-a grass chu kum dang aiin a nal deuh niin a lang. Serena Williams leh Adrian Mannarino te an tlu a, hliam neiin an inhnukdawk zui bawk.

Nilaini zan inkhelah Djokovic pawh a tlu, mahse Serbian tlangval hi a tlu na lo hlauh a, inkhel chhunzawm theiin hnehna a chang. Player langsar leh ṭha ho inlanna hmun a nih avangin hliam an awm belh a hlauhawm hle.

Grass chungchang hian sawi a hlawh a, tennis player khel lai leh chawl tawhte pawhin an sawisel nasa. Mahse nimin tlai thleng kha chuan tournament buatsaihtu lam aṭang chuan tih danglam tumna a la awm hran lo.

Mipa singles inkhel dangah - Nick Kyrgios leh Matteo Berrettini te pawhin hnehna an chang. Nizan khan Roger Federer a inlan a, vawi riat champion tawh hi Richard Gasquet nen inkhelin result erawh kan hre hman lo a ni.