Beiseina nen Spain hmaah Switzerland

Euro last 16-ah Switzerland-in khawvel rinna chu her danglamin thawnthu ngaihnawm an ziak a, rin hlawh lo zawk ni chungin world champion France chu an pet chhuak.

Switzerland chanchinbu lar Le Temps chuan, "Switzerland khawpui zawng zawng chu hlimnain a khat a ni," tiin France an hneh avanga Swiss mipuite hlimna chu a tarlang a, "Kan national football team hlawhtlinna chuan he ram hi ram hlim takah a siam ta a nih hi," an ti hial!

Chutiang taka football-in hmun pawimawh a channa ram chuan zanin dar 9:30 hian Euro 2020 semifinal luh tumin Spain an hmachhawn dawn a, a awlsam dawn lo.

La Roja hian quarterfinal lut turin inkhel hmuhnawm bikah Croatia chu 5-3 in an hneh ve bawk a, he team hian an match hnuhnung pahnihah goal 10 an khung - an hmuhnawm tih mai hian a hrilhfiah zo lo.

Zinkawng ngaihnawm
Switzerland-in Euro-a an match hmasa berah Wales chu 1-1 in an inhnehtawkpui a, match hnihnaah Italy chuan 3-0 in an sawp zui. Swiss team-in sawiselna an tawk a, last 16 luh beiseina a tlem hle.

Swiss team hian an match tawp berah Turkey an hmachhawn dawn a, last 16 lut tur chuan an chak ngei ngei a ngai - a pawimawh hmasa ber erawh fan-te rinna an neih let a ni.

Switzerland coach Vladimir Petkovic-a'n tih dan a ngaihtuah a, an ram chanchinbu lian Schweiz am Wochenende-ah fan-te tan open letter a ziak a, "Hlim taka in nuih theih nan kan theihna zawng zawng kan hlan ang che u tih ka tiam a ni," a ti.

Petkovic-a thutiamah Swiss team an ding nghet - Turkey hnehin last 16 an lut a, France meuh hnawhchhuah erawh an beisei phak piahlam a ni. Zaninah chuan semifinal an mitthla ta.

Mahse maw...
Football-a statistic-in a tarlan loh, thil pawimawh tak chu team inlungrualna leh thawhhona ṭha, phurnate a ni a, hei hi Switzerland-in an nei - France team an hneh miau a!

Mahse, an hmaa ding tur hi Spain an nih avangin Swiss team laka beisei tih san viau a harsa - chu chauh a ni lo. France an hneh ṭuma khel ṭha em em captain Granit Xhaka chu hrem vangin a inlan thei dawn lo.

Xhaka awm loh hlanin Denis Zakaria chu inlan tura ngaih a ni a, kum 24 mi midfielder hi Borussia Mönchengladbach tana khel a nih avangin ngaihtuahawm lutuk erawh a nih a rinawm lo.

Tlarhmaah France laka goal hnih khungtu Haris Seferovic chu bul ṭan leh tura ngaih a ni a, Benfica striker hi Gladbach striker Breel Embolo chuan a thlawp ang a, an hnungah Liverpool midfielder Xherdan Shaqiri a awm ang.

Tlan tam a ngai!
Spain boss Luis Enrique-a'n, "He team hian tum kan nei a, chu chu ṭha taka football khelh a ni. Min hneh duh an awm a nih chuan an tlan tam a ngai dawn a, an khelh ṭhat a ngai bawk," a ti!

Enrique thusawi hi insawi-theihna satliah a ni lo a, an khelh tawh dan hmu chuan an thiamzia leh hmuhnawmzia an hai lo - hemi chelh tur hian Swiss team-in squad an nei ṭha tawk em, tih chu zawhna a ni.

Switzerland boss Petkovic-a'n 3-4-1-2 formation hlir a la hmang a, tlarhma player pathum hi chu a nei ṭha tawk - midfield laiah Zakaria leh Atalanta midfielder Remo Freuler te an inkawp ang.

Wing back-ah goal nawr pui tel turin FC Basel right back Silvan Widmer leh Eintracht Frankfurt tana khel Steven Zuber te chu lut tura ngaih an ni a, France lakah pawh huaisen taka goal nawr ngam team hian Spain pawh an nawr ngam a rinawm.

Spain lam hi
La Roja-in Euro 2020-a an match hmasa pahnihah goal khat chiah khungin point hnih an nei a, mahse, group stage-a an match tawp berah inhri thlain Slovakia chu 5-0 in an sawp.

Luis Enrique nauten passing game khelin inkhel hmuhnawm an chhawp chhuak ṭhin a, last 16-ah 5-3 in Croatia an hneh zui - goal an khung thei a, mahse, Croatia laka an result aṭanga lang chu an chhuah thei tel tih lai hi a ni!

Enrique-a'n a player rem dan hmangin mipui a barakhaih fo a, Swiss laka a team rem dan tur pawh hriat a châkawm.Croatia lakah goal khung mah se tlarhnung lamah César Azpilicueta-a'n nghin chang a nei fo a, rin nawn leh chi a ni ang em? tih chu zawhna awm thei tak a ni.

Tlarhnung laiah Aymeric Laporte chu bul ṭan chianga ngaih a ni a, Pau Torres aiah Eric Garica a luh mai a rinawm. Croatia laka rin loh taka bul ṭan José Gayà chu hahchawl tawh tura ngaih a ni a, chuti a nih chuan Jordi Alba a rawn lut ang.

Tlarhma thlirna
Euro-a an match hmasa pahniha Spain-in sawisel an hlawhna chu an goal khung harsat kha a ni a, he buaina erawh chinfel a ni tawh.

Tlarhma lamah Enrique fachuam Álvaro Morata chu bul ṭan leh ngei tura ngaih a ni a, Croatia laka khel ṭha Pablo Sarabia leh Ferran Torres ten an thlawp leh a rinawm bawk.

Enrique-a'n player a siksawi viau chung pawha a thlak danglam meuh loh chu a midfield a ni a, captain Sergio Busquets, Koke leh Barcelona midfielder thiam bik Pedri ten bul an ṭan leh ang.

Kil tin aṭanga thlir pawhin Spain an ṭha zawk a, mahse, he thawnthu hi chu France lakah pawh khan Switzerland hi hrilh an ni tawh - world champion hneh thei team-in Spain an hlauh thut ring suh.

France laka kan inkhelah khan thinlung zawng zawng kan pe a, ka player-te khan 120% an theihna an pe a ni. Ka team enkawlin game an khelh tawha ropui ber pawl a ni a, Spain lakah pawh khatiang bawk khan kan khelh leh a ngai dawn a ni.
- Vladimir Petkovic, Switzerland coach

Keini chuan long ball kan khel ve ngai lo a, Croatia ang tho khan harsa taka beih leh ngai dawn pawh ni se defensive football kan khel ve ngai lo ang. Keini chuan tlarhnung kan ven ve dan ṭha ber chu ball chan tam a, ball ken reng hi a ni mai.
- Luis Enrique, Spain coach