Copa America : Rinkai Brazil hmachhawn tur Chile

Football thiam ram, an thiam avanga world champion vawi nga ni thei Brazil chuan Copa America 2021 quarterfinal khel turin July 3, Inrinni zing dar 5:30 hian Chile an hmachhawn dawn.

Champion lai Brazil hi group B hmahruaitu niin, an khelh tawh chinah vawi thum chak thei an ni, ṭum khat inhnehtawkin tlawm an la nei lo. Chile erawh group A aṭanga inpet kai ni mah se, palina ni chunga tlang hram an ni.

Zanin dar 2:30 hian Peru leh Paraguay ten quarterfinal match hmasa ber an khel dawn bawk, a chak zawk hian Brazil leh Chile inkhela chak zawk chu semifinal-ah an hmachhawn chhunzawm leh ang.

Brazil an ṭha tawk
Tite-a'n Copa America champion nih a duh, chumi rual chiah chuan nakkuma neih tur FIFA World Cup a thlirlawk bawk. Tun inelna neih laiah player a siksawi nasa, league match hnuhnung bera Ecuador an hmachhawn ṭum phei chuan player ṭha a chawlhtir.

Zaninah erawh chak ngei ngei a ngai dawn - Neymar, Danilo, Thiago Silva, Alex Sandro, Gabriel Jesus leh Richarlison ten inkhel bul an ṭan a rinawm leh tawh. Casemiro leh Fred nge Douglas Luiz leh Fabinho inkawp zawk ang, tih erawh hriatthiam a har.

Neymar, Jesus leh Richarlison an inkawp a nih chuan tlarhma lam chu an ngaihtuahawm lo, an mamawh tawk goal an khung ngei ang tih pawh a rin theih. Si ban nghak turin Ederson aiah Alisson a luh leh tawh a rinawm zawk bawk.

Tlarhnung lam pawh siksawi viau ṭhin mah se Marquinhos chu hmun nghet changtu a ni. Kum 27 mi, Paris Saint-Germain defender leh tawnhriat nei ṭha Silva te inkawp hi Chile tan paltlang an awlsam dawn lo - match dang ang bawkin an chakna kulhpui an ni leh ang.

Brazil coach Tite chuan, "Tlarhnung hi a pawimawh, champion tur chuan inrem phui a ngai," tiin a lo sawi tawh a, chumi tihlawhtling tur chuan Silva hi a ringtawk - kum 36 mi defender hi World Cup 2022 hmathlir zingah pawh a la tel.

Sanchez a chiang lo
Alexis Sanchez-a'n hliam vangin group match a khel thei lo, match hmasa lamah a inlan thei dawn lo tih hre chungin coach Martín Lasarte-a'n a hruai tel lui tho a, quarterfinal-ah hian a inlan thei ngei dawn em, tih a la chiang lo.

Arsenal leh Manchester United tan pawha khel tawh Sanchez hian training a zawm pangngai tawh, amaherawhchu a inkhelh lohna a rei tawh avangin khelmual chhunga minute 90 hmang tur chuan rin ngam a la har mai thei.

Inkhel tur thlirlawkin Lasarte chuan, "Eng inelna pawh nise a thlengtu team nena inkhelh chu a awlsam ngai lo. A bik takin Brazil hi team ṭha bik an ni a, an laka hnehna chang tur chuan tihsual nei loa kan khelh a ngai dawn.

"A ṭha thei ang bera inkhel turin kan inbuatsaih, tun hma pawhin hetiang hi kan lo ti thei tawh ṭhin. Brazil goal nawr natna lai kan hria, chumi veng tur leh an chak lohna laia bei let turin kan inzir," tiin a sawi.

Ram pahnih hian 2014 World Cup last 16-ah khan inkhel hmuhnawm an lo chhawp chhuak tawh, hun pangngaiah 1-1 in an inhnehtawk. Extra time tawp dawna Chile striker Mauricio Pinilla ball petin bar a per hlauh, penalty shoot out-ah erawh Tite naute 3-2 in an vannei. Tun ṭuma an inkhel pawh hi a hmuhnawm ang.