Everton coach thar Benitez!

Premier League club Eveton chuan an coach thar an puang ta nge nge a, a hming chu Rafael Benitez a ni! Liverpool boss hlui hian Merseyside club-ah kum thum cham turin contract a ziak a, Everton logo hmaa a nui hmel chu Reds fan-ten inhmeh lo an ti ang.

Benitez chuan, "Ever-ton ka zawm thei hi ka lawm takzet. He club hian hmasawn zel turin theihna a neiah ka ngai a, he club-in a tumte tihlawhtling tura a beihna kawnga tha thawhtu ka ni thei tur hi ka lawm takzet a ni," a ti.

Italian journalist lar leh football transfer-a rin hlawh Fabrizio Romano chuan Benitez hi Italian club ṭhenkhat pawhin an rim thu a sawi a, mahse, Spanish coach hian Premier League-a kir leh a duh avangin Serie A lam sawmna hnarin Everton a pan.

Everton-a share ngah ber Farhad Moshiri chuan, "Rafa hian a tawnhriat leh hriatzauna hmangin kan rilru a hneh a, chung zawng zawng aia min hnehtu erawh hlawhtlin duha a tuihalna hi a ni.

"Kan coach ni tura Rafa kher kan ruatna chhan chu he club leh Everton mi leh sate tan hlawhtlinna ropui tak min chhawpsak kan beisei vang a ni a, league chung lama awm chunga nomawi chawi ngei tum tur pawh kan ni.

"Rafa hian sulhnu ropui tak a lo hnutchhiah tawh a, coaching khaw-vela tawnhriat ropui tak nei sa a lo ni bawk nen, kan tum ram thleng tur chuan ani aia duhthlan tur ṭha zawk an awm chuang lo," a ti.

Benitez hian kum 1993 khan Real Madrid B team aṭangin a coaching career a ṭan a, khawvel huapa a lar chhuahna tak erawh July 2001-a Valencia a zawm kha a ni a, La Liga club tan hian league nomawi pahnih bakah UEFA Cup-ah a champion pui hman.

Kum 2004 khan Liverpool a pan a, Cham-pions League nomawi a chawipui bakah kum 2007 khan a vawi hnih nan CL final a hruai thleng leh a, nomawi erawh a chawi nawn lo - FA Cup, Community Shield leh UEFA Super Cup-ah te a champion bawk a, Reds a chhuahsan hnuah pawh hlawhtlinnain a zui nasa hle.

Benitez hian Anfield-a mangṭha hnuah Inter Milan, Chelsea, Napoli, Real Marid, Newcastle United leh Dalian Professional te a enkawl tawh a, a tawnhriat ringawt pawh hi Everton ang team tan chuan ṭangkaipui tham a ni ang.

Benitez hi Everton fans zingah duhtu leh duh lotu an tam hle a, tun hnai lawk khan fans kal fawr zual ṭhenkhat chuan Benitez-a in bul hnaiah Spanish manager vauna an hnutchhiah hial a ni - Merseyside Police-te chuan he thil thleng hi an chhui mek.

February 2007 khan Benitez hian Everton chu 'club tenau' tiin a sawi a, he a thusawi avang hian Everton fans tam takin an huat phah. Mahse, a hnu lawkah a thusawi chu Anfield-a an inkhela Everton game, defensive style lutuk a demna lam a nih zawk thu a sawi - tam takin tun thlengin an la pai dam thei chuang lo.