NBA Finals khel tur Phoenix Suns

Phoenix Suns chuan kum 1993 hnua a vawi khat nan NBA Finals an khel ve leh dawn ta. Suns hian nimin zing khan Los Angeles Clippers lakah 130-103 a hnehna changin Western Conference finals series chu 4-2 in an la.

Eastern Conference finals lamah Atlanta Hawks leh Milwaukee Bucks te 2-2 in an inhnehtawk mek a, conference pahniha champion team ve ve hian NBA champion an zawng leh dawn a ni.

Suns an chak
Nimin zing Western Conference final game 6 inkhelah Suns tan Chris Paul chu an player pawimawh leh ṭangkai a ni, point 41 zet neiin a team a chakpui. Paul bakah hian point 22 neitu Devin Booker a langsar ve bawk.

Suns hian season hnuhnung 10 chhung chu playoff pawh an thleng phak ngai lo, kuminah erawh regular season an hmang ṭha. Vawi 51 chakin table-ah pahnihna an ni a, an chungah hian vawi 52 chak Utah Jazz chiah an awm.

Playoff tir lamah beisei angin kal fawr thei lo mah se a rei tual tuala an che ṭha tawlh tawlh. Tunah chuan conference champion an ni fel a, an hmabak chu NBA champion nih chiah a ni ta - an phur vanglai tak a ni ang.

Paul a lawm
Paul hi kum 36 mi a ni tawh a, NBA All-Star team-ah pawh vawi 11 zet a tel tawh; USA tan Olympic gold medal pahnih a la tawh bawk. Mahse, Clippers player hlui hian NBA Finals-ah a team a hruai thlen vawi khatna a ni thung.

Hnehna an chan hnuah Paul chuan, "Kum 16 chhungin hliam, natna, inzai, chak, chak loh, hun hlimawm leh hrehawm tinreng ka lo paltlang ve tawh. Tunah chuan hlima lawm hun a ni a, hmabak ka nei mah ila kan chak hi kan lawm phawt tur a ni ang.

"Tun hun kan thlen theih chhan hi mimal thil tih ṭhat vang a ni lo, player zawng zawng thawhrah a ni. Chumai bakah pawn lam ṭanga tawp chin nei loa min thlawp tlattu fans kan nei ṭha hi kan vannei takzet," a ti.