Spurs an hlawhtling ta - Nuno an lalut!

Tottenham Hotspur-in April thlaa Jose Mourinho an ban hnuah an beisei ang coach hmu lawk thei lo mah se Nilaini zanah chanchin lawmawm an nei ve ta nge nge a, season thar aṭanga an coach ni turin Nuno Espirito Santo an lalut.

Wolverhampton Wanderers boss hlui Nuno hian kum hnih chhung atan contract a ziak nia sawi a ni a, Big Six huang chhunga club a enkawl vawi khatna tur a nih avangin boruak sang a zawh leh zawh loh a hriat thuai ang.

Nuno chuan, "Spurs ka enkawl thei tur hi ka lawmin ka tan chuan chawimawina a ni a, hna ṭan hlan ka nghakhlel tawh hle a ni," a ti a, "Hun khawhral mai mai a theih tawh loh a, pre-season a hnaih tawh avangin hna kan thawk nghal ang," a ti.

Portuguese coach Nuno hian 2017-18 season khan Championship nomawi a chawi a, Wolves chu Premier League khel turin a hruai thleng - season hnih chu a zawnin pasarihna a nihpui zui a, season hman zawh takah 13-na a nihpui avangin an inṭha ṭhen.

Spurs chairman Daniel Levy chuan, "Hun rei tak chhung dawhthei taka min nghah avangin fan-te chungah lawmthu kan sawi a, kan thisena bet tlat, attacking football leh hmuhnawm khel tura kan kir leh a ngaih thu hi ka sawi fo tawh bawk.

"Managing director of football Fabio Paratici nen Nuno hi kan ring tawk a, kan team theihna nei sang tak hrual a, player naupang zawkte puitling tura chhera, team hmuhnawm tak din turin kan beisei a ni," a ti - Spurs in manager an nei ve ta!