Hneh nei loin Andreescu a tla

Bianca Andreescu tan grass court-a inkhelh chu thil awlsam a la ni thei lo. Canadian star hian Nilaini zan khan Wimbledon first round a khel a, a khingpui Alize Cornet lakah 6-2, 6-1 in a tlawm.

US Open 2019 champion a nih hnuah Andreescu hian beisei a la phak leh lo. Hliam vangin a buai a, chumi hnuah hri leng vangin harsatna a tawk leh bawk. Tun ṭumah hian seeded pangana pek a ni a, tun inelna bika tla zinga ranking sang ber a la ni.

Wimbledon hma hian Berlin khawpuiah inbuatsaihna a nei a, hemi ṭum pawh hian world number 58 Cornet hi a ngam lo. Tihsual a ngah a, vawi 34 zet unforced errors a neih chu a chak lohna langsar a ni, service a ṭha tawk lo bawk.

Andreescu chuan, "A tirah kha chuan ka khel chhe bik lo, mahse game lina aṭang khan a khelh dan phung a thlak a, ka insiamrem ve hman tawh lo. Tun aia ṭha zawka khel tur hi chu ka ni a, mahse ka thei miau si lo," tiin a sawi.

Inkhel dangah world number 6 Sofia Kenin pawh a tlawm. Austrlian Open nomawi a chawi hnuah French Open final lut leh thei ni mah se Kenin hi Madison Brengle nen minute 45 chhung lek an inkhelh hnuah 6-2, 6-4 in a chak lo.

Kum 22 mi Kenin hian a match hmasa zawkah Wang Xinyu chu straight set-in a hneh, second round-ah erawh tihsual a ngah hle. A service vawi ruk ngawt hlohin, unforced errors vawi 41 a nei bawk.