Arsenal-ah Tavares a lut dawn

Tlarhnung thuam chak turin Arsenal chuan Benfica left-back Nuno Tavares an lalut dawn. Portugal U21 international hi pound maktaduai 6.9 man niin, a contract rei zawng erawh chiang taka tarlan a ni rih lo.

Kum 21 mi Tavares hi Benfica aṭanga inzir chhuak niin, season liam ta khan club tan league match 14 a khel. Feet ruka sang defender hi tlarhnung lam bakah goal nawr kawngah pawh a thawh hlawk ṭhin.

Mikel Arteta-a'n tlarhnung tih chak a tum mek zel, a neihsa Kieran Tierney chu hun rei zawk atan an thlung nghet tawh. Brighton defender Ben White lak tumin hma an la mek a, England international hi pound maktaduai 50 vela lei theih an beisei.

English chanchinbu rintlak Guardian-in a tarlan danin Gunners hian Anderlecht midfielder Albert Sambi Lokonga pawh lak an tum a, amanah euro maktaduai 17.5 vel an hmang dawn niin an sawi.

North London club hian Manuel Locatelli pawh an dawr mek. Sassuolo midfielder hi Euro 2020-ah Italy tan a khel ṭha thei hle a, club hrang hrang ngaihventu zinga Arsenal pawh an tel.

Sassuolo sporting director Giovanni Carnevali chuan, "A nihna tak sawi chuan Manuel ngaihventu an tam. An zingah Arsenal an tel a, tun dinhmunah chuan anni hian tawktarh an nei ṭha ber," tiin a sawi.