Euro 2020-ah tu nge top scorer dawn?

European Championship 2020-ah last 16 khelh zawh a ni tawh a, goal nga khungtu Cristiano Ronaldo-a'n a la khung tam ber. Amaherawhchu Portugal an tlak tawh avangin Ronaldo khum thei tur an awm a, champion tur a la chian loh ang chiahin goal khung tam ber hi a la chiang lo.

Ronaldo hnaihtu
Tun inelnaah hian goal li khung pathum an awm a, chungte chu Czech Republic striker Patrik Schick, France striker Karim Benzema leh Sweden winger Emil Forsberg te an ni. France leh Sweden an tlak tawh avangin Schick hi Ronaldo hnaih ber tihin a sawi theih a, Czech Republic-in quarterfinal-ah Denmark an hmachhawn dawn.

Goal thum khung zingah England forward Raheem Sterling leh Switzerland striker Haris Seferovic ten goal an la khung belh thei a. Goal hnih khung zingah Spain striker Alvaro Morata leh Italy forward Ciro Immobile a langsar viau bawk.

Premier League top scorer Harry Kane erawhin goal khat chiah a la khung a, England striker hi a theihna thlirin top scorer ni thei chu a ni a, amaherawhchu group stage-ah goal a khung loh avangin a harsa tawh ang.

Ngaihnawm dang
Switzerland midfielder Steven Zuber-a'n assist vawi li nei tawhin a la ngah ber a, a hnuai chiah awm Denmark midfielder Pierre-Emile Hojbjerg-a'n assist vawi thum a nei tawh bawk.

Euro 2020-ah Leonardo Spinazzola leh Loic Nego an la tlan chak ber a, Italy leh Hungary wing back te hi 33.8 km/hr a chakin a tlan. Austria midfielder Marcel Sabitzer-a'n 48.7 km a tlan a, a tlan hnem ber. Sabitzer hnuaiah hian Albin Ekdal (47.2 km) leh Spain midfielder Pedri (46.9 km) te an awm a ni.