England vs Ukraine: Three Lions-in semifinal an mitthla

Football khawvela thawm nei lian pawl ni reng ṭhin England chuan zanin dar 12:30 hian Euro quarterfinal an khel dawn a, an hmaa ding tur hi Ukraine an ni.

Team pahnih squad thlirin England-in rin an hlawh zawk a nih pawhin a awm lo hran lo a, Gareth Southgate-a naute hian semifinal mitthla chungin an inkhelhna tur hmun Rome khawpui an pan ang.

Chutihruala hriat tel tur chu, England tan zanin inkhel tur hi Euro 2020-a an ram pawn lama an zinchhuah vena hmasa ber tur a ni a, Wembley puihna tel loin eng ang tak nge an nih, tih chu zanin hi a hriat hun a ni e.

Ukraine-in vannei takin last 16 an lut a, team ṭha zawk Sweden an hneh zui - zaninah rin hlawh lo zawk ni leh dawn mah se an zam lo ang tih chu hrilh nawn kan ngai lo.

Final lo chu
Southgate-a'n World Cup 2018 leh UEFA Nations League semifinal-ah England a hruai thleng ve ve a, tun inelna ṭan a nih hma khan an tum tur chu final luh a nih thu a sawi.

England-in group hmahruaitu ni chungin last 16 an lut zui a, an hmaa ding chu Germany an ni - Three Lions hian German team an hmachhawn hma hian hmahruaitu an nih chuan France, Portugal leh Germany zinga a tu emaw ber an hmachhawn dawn tih an hre lawk sa.

Hei vang hian Southgate-a'n huaisen tih a hlawh a, English coach hian, "Champion tur chuan anni ang team hi hneh an ngai a ni," a ti awlsam et - a sawi ang ngeiin Germany an hneh zui.

Quarterfinal-ah erawh team langsar zinga chhal ni lo Ukraine an hmachhawn dawn a, Wembley-ah a ni ta lo thung - England tan zuam luatah tihsual theih a ni a, fimkhur a finthlak ang.

Inthlak danglamna
Southgate-a'n Germany lakah rin loh takin tlarhnungah defender pathum a rawn rem a, wing back-ah Kieran Trippier leh Luke Shaw an awm - hei hi Germany wing back pahnih Josh Kimmich leh Robin Gosens dan chah nana tih a ni a, a hlawhtling.

Zaninah erawh Southgate hian tlarhnunga player pali a rem ṭhin dan pangngai chu a rawn hmang tura ngaih a ni a, Kyle Walker, John Stones, Harry Maguire leh Trippier te an inrem a rinawm.

Tlarhnunga player pali rem hian creative midfield tan kawng a hawng tura ngaih a ni a, chuti a nih chuan 4-3-3 chu England tana formation fuh tur niin a lang. Mason Mount chu lo kir leh tawh tura ngaih a ni a, ani hi a lut a nih chuan tlarhma goal nawr a pui ang - Jack Grealish a lut thut thei bawk.

Kalvin Phillips leh Declan Rice-te chu yellow card hmu sa an ni a, hremna an pumpelh theih nan an pahnih luhtir ai chuan a tu emaw zawk aiah Jordan Henderson chu lut tura ngaih a ni. Tlarhmaah Harry Kane thlawp turin Raheem Sterling leh Phil Foden an awm bawk ang.

Ukraine lam hi...
Ukraine-in Euro last 16 an luh theih chhan chu Sweden-in Poland an hneh vang a ni a, Sweden hian Poland hi hneh lo ta se Andriy Shevchenko enkawl Ukraine hi tla tur an ni.

Mahse, Sweden chak zarah Ukraine hi pathumna ti ṭha pali zingah an tel hram - group stage-a an hneh chhun chu North Macedonia an ni a, an ropui lo hle.

Round of 16-ah erawh Ukraine-in thawnthu dang min hrilh a, team khel ṭha tluang tak Sweden chu 2-1 in an hneh a, last 16 an luh theih nana hna thawhsaktu team an pet chhuak daih!

Zaninah pawh he team hian inrintawkna nen Rome khawpui an pan ang tih a chiang a, an coach huaisen Shevchenko hoin semifinal luh ngei an tum ang.

Inlan dan tur
Ukraine striker Artem Besedin chu Sweden nen an inkhelh ṭumin hliam na tak a tuar a, kum 2022 thleng a chawlh a ngai hial mai thei - mahse, an striker pawimawh ber a nih loh avangin mangan lutukna tur a ni loin a lang.

Shevchenko-a'n 4-3-3 formation a hmang ṭhin a, mahse, Sweden lakah erawh 3-5-2 a rawn hmang a, a hlawhtlinpui - England lakah pawh he formation bawk hi rawn hmang tura rinna a sang hle.

Chuti a nih chuan 4-3-3 a midfielder anga chhawr ṭhin Oleksandr Zinchenko chu wing back-ah a let leh dawn tihna a ni a, a ṭhat dan ber pawh a ni - Zenit St. Petersburg right back Vyacheslav Karavayev a awm bawk.

Andriy Yarmolenko hian West Ham tan season duhawm tak hmang lo mah se Ukraine tan match 98-a goal 42 khung thei a nih avangin bul a ṭan leh ngei ang a, tlarhmaah Arsenal nena sawizawm Roman Yaremchuk nen an inkawp ang.

England fans tan inkhel en a harsa dawn
Group stage leh last 16 match-te Wembley Stadium-a an khelh hnuin England-in quarterfinal khel turin Rome khawpui an pan a ṭul a, fan-te thlawpna hnuaia khel ṭhin team hian zaninah erawh an beisei ang fans an nei thei dawn lo niin a lang.

UK aṭanga Italy pan tur England fans chuan Covid-19 an kai lo tih lantirna certificate an neih ngei a ngai a, mahse, he certificate hi an zin hma darkar 48 aia rei a ni tur a ni lo. Rome khawpui an thlen rualin European Union passenger locator form an tihah an awm dan tur an ziak leh ang a, ni nga chhung an inkhunghrang bawk ang.

Chumi awmzia chu UK aṭanga Roma khawpui fans tan pawh stadium-ah aiin mahni thlenna hotel aṭanga inkhel enna chance a sawng zawk a, zin loh a fuh zawk. Hei mai a ni lo - UK lama an kir hnuah ni 10 chhung an inkhunghrang leh ang a, a ni hnihna leh ni riatnaah Covid-19 test an nei bawk ang.

English football-a thuneitu sang ber Football Association chu zanin inkhel tur atan hian ticket 2,560 phalsak an ni a, Stadio Olimpico khelmuala inkhel en thei zat ruahman 16,000 aṭanga teh chuan 16% tihna a ni.
Mahse, UEFA leh pawl dang nena inbiak rawnna an neih hnuin FA chuan official anga ticket an dawn tur zat hi lak loh mai an rel a, uefa.com lama in register thlap, UK-a cheng lo England fans tan lei theih turin chhawpchhuah a ni ang.

Team inthlau tak chu
Zanin inkhel tur hi sum hlutna hmanga chin fel tur chu ni se Ukraine-in England hmaah chance an nei lo a, an vanneihna erawh sum hmangin a chak zawk zawn a ni dawn lo - khelmualah an chingfel ang.

England squad hlutna hi chhutin, player pakhat hi euro maktaduai 57.8 man ang zel an ni - Ukraine erawh player pakhat hlutna hi euro maktaduai 6.6 ang a ni thung. Ukraine player langsar Oleksandr Zinchenko pawhin, "England bench ringawt hi kan squad pumpui hlutna let thum vel an ni," a ti a, team pahnih inthlauhzia a sawi.

Mahse, Ukraine defender Mykola Matviyenko chuan beiseina an neih thu sawiin, "A harsa dawn tih chu kan hria, mahse, beiseina kan nei tlat a ni," a ti a, a thiam pali zinga tel ngei an tum.

Eng pawh a thleng thei - Shevchenko
English player leh fan ten khelmual sirah, an hmachhawn Ukraine player-te ai pawha an hriatchian zawk an hmu dawn a, a hming chu Andriy Shevchenko a ni.

Ukrainian coach hi a vanglai chuan khawvela striker hmuhnawm ber pawl a ni a, zaninah erawh coach ni chungin an ram team chu European championship-a a vawi khat nan quarterfinal a khelhpui dawn - an hmaa ding tur chu England an ni.

Shevchenko chuan, "England hi team ṭha tak an ni a, an bench pawh a chhah ṭha hle. Coaching staff pawh ṭha tak tak an nei a, anni nena kan inkhel tur hi a hautakzia ka hre vek a ni. "Group stage-a an match zawng zawng pawh kha ka lo en vek a, an lama goal khung a harsa hle - mahse, an ṭhatna hian minti hlauthawng tur a ni lo," a ti.

Shevchenko chuan sawi chhunzawmin, "England ṭhatna hian min tiphur zawk tur a ni. Hringnun ang thoin football-ah pawh engpawh a thleng thei a, kan fan-te hlim taka an zai theih nan kan theihna zawng zawng kan hlan ang," tiin a sawi.

Player a nih laia Ballon d'Or chawimawina pawh lo dawng tawh Shevchenko hian July 2016 aṭang khan Ukraine hi a enkawl ṭan a, match 51-a kaihhruaiah vawi 25 hnehna chanpuiin vawi 13 an tlawm a, vawi 13 an khingpui an inhnehtawkpui.

Euro-ah England leh Ukraine hi vawi khat chiah an la intawng a, kum 2012 khan group stage-ah 1-0 in Ukraine hi an hneh a, tuna Ukraine boss Andriy Shevchenko hi bench aṭangin a lut.

Kan thlen tum tak kan la thleng lo. Germany laka kan hnehna chan kha chu nakinah ka la thlirkir leh ang a, tunah chuan zanin kan result tur hi ka ngai pawimawh ber.
- Gareth Southgate, England coach