Chuai thei lo Federer a la thiam reng

Roger Federer chuan Richard Gasquet hnehin Wimbledon third round a inhlangkai. Federer hian zaninah British number 2 Cameron Norrie a hmachhawn chhunzawm leh nghal dawn a ni.

Kum 39 mi a ni tawh a, a la chuai chuang lo - Swiss star hian darkar khat leh minute 51 chhung lekin Richard Gasquet chu 7‑6 (1), 6-1, 6-4 in a hneh a, inkhelh chhung zawngin harsatna lian tham a tawk lo.

Roger a class
Federer a nih tawh chuan Centre Court nen a inzawm nghet tlat a, ṭhenhran theih an ni lo. All England Club-a tennis stadium ropui bera Federer i hmachhawn a nih chuan mipui chu i lama ṭang turin beisei suh - Roger-a ta vek an ni ṭhin.

Ningani zan inkhelah pawh thawnthu a danglam chuang lo. Mipui lamin an 'Darling' kha a ni miau a, a service ṭha leh backhand mawi tak tak hmanga point an hlawh chhuah lai chuan thawm a ṭha thei rem rem hle.

A match hmasa berah Federer hian Adrian Mannarino hmachhawnin a talbuai deuh, a khup hliam vawi hnih ngawt zai a nih tawh bawk avangin a lakah beisei neih san a har; mahse, Gasquet laka a khelh dan thlir erawh chuan champion thei a la ni.

Hmabak Norrie
Inkhel dangah Norrie chuan Australian tlangval, duhsak taka wildcard an pek Alex Bolt chu 6-3, 6-1, 6-2 in a lo hneh. Norrie hian Wimbledon bikah second round a paltlang vawi khatna a ni a, a match lehpeka a hmachhawn tur chu Federer a ni.

Wimbledon vawi riat champion tawh Federer chuan, "Kum 20 chhung chu he hmunah hian duhsakna tinreng ka lo dawng tawh. Chet ṭhat leh chak loh lai pawhin mipui thlawpna hi 100% ka dawng reng ṭhin.

"Tunah erawh tualchhung tlangval nen kan inkhel dawn a ni a, entu lamin Cam-a an ṭan zawk a nih pawhin a mak ka ti lo ang. Ani hi player ṭha tak a ni a, chutih rualin kei pawh round sang zawk thlen duh ka nih avangin chak ka tum ang," a ti.

Zverev a tlang
Grand Slam an khelh dawn a pianga rinkai ni ṭhin, mahse la hlawhtling thei chiah lo chu Alexander Zverev a ni. German tlangval hian Tennys Sandgren lakah 7-5, 6-2, 6-3 a hnehna changin third round a inhlangkai.

Kum 24 mi, season hmasa US Open finalist Zverev hian Taylor Fritz a hmachhawn leh ang. Fritz hian amah ang bawka American player Steve Johnson chu 6-4, 7-6 (7-4), 4-6, 6-7 (4-7) in a lo hneh ve bawk.

Wimbledon bikah chuan Zverev-a'n record a neih ṭhat ber chu 2014 kha niin, fourth round a thleng. Season dangah erawh thlen san a nei ngai lo. Kuminah hian rinkai ber chu a ni lo, mahse match hnih a khelh tawh dan thlir chuan hlawhtling turin theihna a nei.

Medvedev a chak
Daniil Medvedev pawhin hnehna chang turin hun a mamawh rei lo. Russian player hian darkar khat leh minute 34 chhung lekin Carlos Alcaraz chu 6-4, 6-1, 6-2 in a hneh a, set hloh loin hnehna a chang.

World number 3 Medvedev chuan, "Scoreline en ang ngawt kha a ni lo, a takah chuan inkhel awlsam a ni lo hle. Carlos kha player ṭha tak a ni, a ball vuak ṭhenkhat kha chuan min ti hrilhhai thei hle, kum 18 mi chauh a la nih avangin a hmabak a êng," a ti.

Kum 25 mi Medvedev hi kuminah seeded pathumna a ni phak a, mahse grass court inelna lianah hian tun hmain third round a la pel ngai lo - beisei san ngam a har. Zaninah US Open champion hlui Marin Cilic nen an inkhel leh ang.