Copa America : Messi awmna Argentina tan fiahna hmasa
'Argentina jersey ha chung ngeia nomawi chawi hi ka duhthusam a ni' tiin Copa America 2021 khelh ṭan hma khan Lionel Messi-a'n a sawi a, a duhthusam ti puitling turin match thum chak a la hmabak.
Pathianni zing dar 6:30 hian Copa America quarterfinal khel turin world champion vawi hnih ni tawh Argentina hian Ecuador an hmachhawn dawn a, Inrinni zan dar 3:30-ah Uruguay leh Colombia te an inkhel bawk ang.
Rinkai zawk
Messi chauh a ni lo, player dang an neih dan khaikhin pawhin Argentina hi Ecuador ai chuan chak tura rinkai zawk a ni. Amaherawhchu a chak lo zawk tlak nghal tur a nih avangin eng team pawh chak thei an ni ve bawk.
La Albiceleste (Argentina sawina) hi group A hma-hruaitu niin, match li an khelhah vawi thum an chak - ṭum khat chu an khingpui nen an inhnehtawk; point 10 hmuin anmahni hnaih bertu Uruguay aiin point thumin an sang zawk a ni.
Ecuador erawh chak ni hmel la hmu lo an ni! Group match vawi li an khelhah vawi khat an tlawm a, vawi thum inhnehtawkin point thum an hmu; anmahni ang bawka chak nei lo Venezuela aiin point khata sang chungin an tlang hram.
Messi awmna
Copa America 2021 an match hmasa berah Argentina hi Chile nen 1-1 in an inhnehtawk, captain Messi-a'n freekick mawi bik khung mah se penalty an chawi a, an goal an venghim tluan thei lo.
Barcelona forward Messi-a'n Bolivia lakah goal hnih khung lehin a ṭhiante khung tur a siamsak bawk a, match li a khelhah vawi thum chu 'man of the match' atan thlan a ni, tun ṭumah pawh hian a innghahna a ni leh dawn.
Messi bula khel tur hian Lautaro Martinez an nei, Inter Milan striker nen hian an khelh dun tawh chinah an inman viau. Barca striker thar Sergio Aguero a la awm bawk avangin tu zawkin nge bul ṭan ang tih hriatthiam a harsa.
Lionel Scaloni-a'n a naute a khelhtir dan a siksawi fo a, tlarhma lamah Messi, Aguero leh Martinez a luh rualtir a nih pawhin a mak lo ang. A pawimawh ber chu engtiangin nge Messi a ṭangkai zual theih ang, tih hi a ni.
Tlarhnung lam
Argentina tlarhnung lama tawnhriat nei ṭha ber chu Nicolas Otamendi a ni a, amaherawhchu tun Copa America bika an thlamuanpui ber tia sawi ngam chu Atalanta defender rinrawl Cristian Romero a ni thung.
Tlarhma lam aiin Scaloni-a'n a hnung lam hi a siksawi nasa, match li a khelh tawh chinah Romero hian vawi hnih bul ṭanin, a tir aṭanga a luhna inkhelah goal an chhuah lo - Ecuador lakah pawh bul a ṭan ngei a rinawm.
Kum 23 mi, 6ft 1in a sang defender hian season liam ta kha Italian club tan Serie A match 31 a khel a, rinrawl a ni phak. Inrintawkna a nei sangin ram tan pawh a theihna ang takin a khel chhuak - tun hma lama La Albiceleste buaina ni ṭhin tlarhnung thuam chaktu a ni mek.
Si ban nghak turin Emi-liano Martínez an nei. Arsenal keeper hlui hian inkhelh tam duhin Aston Villa a pan a, ram tan pawh hmun a chang chhunzawm. Copa America hi rinrawl ni chunga an ram jersey a hakna hmasa a ni a, a khelh tawh chinah a che chhe lo.
