Denmark leh Czech an intiat tawk em?

FIFA ranking-ah Denmark hi 10-naah an awm a, Czech Republic hi 40-na daih an ni thung. Amaherawhchu Danish Dynamite hian an player chhuanvawr Christian Eriksen an chhawr thei tawh lo a, ranking aṭanga teh a rem lo.

Denmark harsatna belhchhah turin Wales nen an inkhelh ṭumin inhliam vangin player pawimawh Thomas Delaney, Simon Kjaer leh Jens Stryger te lakchhuah an ni a, RB Leipzig forward Yussuf Poulsen phei chu hliam vangin a inlan lo hrim hrim.

Nilaini training-ah Poulsen, Kjaer leh Delaney te hian team training an zawm tluan thei lo vek a, amaherawhchu Czech an hmachhawn hunah meuh chuan an inpeih turah a ngaih theih. Nimin khan Poulsen chuan, "Minute 90 chu ka la tlin lo ang a, darkar khat chu ka tlin tawh ang," tiin a sawi.

Denmark hian Erisken-a awm loh hnua an ṭhat dan bera ngaih theihin Czech an hmachhawn thei dawn. Tlarhmaah hming langsar zawk Martin Braithwaite te aiin Sampdoria forward Mikkel Damsgaard a langsar zawk.

Kum 20 mi Damsgaard hi Eriksen-a thachhang dawltu turin Euro 2020-ah hian hruai a ni a, Inter Milan midfielder hmun ruak a awh zo rih hle. Damsgaard hian season liam ta khan Sampdoria tan match 35 a khel pha a, Denmark winger chuan, "Eriksen hi ka player ngaihsan a ni a, amah anga khelh hi ka duh dan a ni," tiin a sawi.

Damsgaard bakah hian amah ang bawka hun ṭha neih hmang ṭangkai Kasper Dolberg a pawimawh dawn a, tlarhnungah Lammuala inkhel tawh Jannik Vestergaard-a'n hmun pawimawh a chang dawn.

Czech Republic-in tun inelnaa striker che ṭha zinga tel phak Patrik Schick an kawl. Hei bakah hian coach Jaroslav Silhavy-a'n Wales an hmachhawn ṭumin bul ṭantu zingah Petr Sevcik, Pavel Kaderabek leh Antonin Barak te a telh a, an ṭhat phah hle. Netherlands-in Czech goal zawnah vawi khat mah an pet lo!

Record nei ṭha zawk Czech
Czech Republic leh Denmark hi ṭum 26 an inhmachhawn tawh a, Czech hian vawi 11 hnehna changin vawi 11 an inhnehtawk a, Denmark hi ṭum hnih chauh an chak. Euro C'ship bikah ram pahnih hi vawi li an inkhel a, Czech hi ṭum thum chakin vawi khat an inhnehtawk a, Denmark hi an la chak ve lo.

Ram pahnih hi Euro-a an inhmachhawn hnuhnun ber chu kum 2004 daih tawh kha a ni a, quarterfinal-ah intawngin 3-0 in Czech an chak. Liverpool forward hlui Milan Baros-a'n goal hnih a khung bakah 6ft 8in zeta sang Jan Koller-a'n goal khat a khung bawk.

Inlan tura beisei
Czech Republic: Vaclik; Coufal, Celůstka, Kalas, Kaderabek; Holes, Soucek; Masopust, Barák, Sevcík; Schick
Yellow card hmu tawhte: Coufal, Hložek, Masopust

Denmark: Schmeichel; Christensen, Kjaer, Vestergaard; Wass, Hojbjerg, Delaney, Maehle; Braithwaite, Dolberg, Damsgaard
Yellow card hmu tawhte: Damsgaard, Delaney, Jensen, Wass

Kan dinhmun hi a ṭha a, hetiang hun ṭha hi chu kan nei leh tawh mai mai dawn lo. Hun ṭha tawng turin kan thawkrim a, kan nghak rei a, kan naupan lai aṭanga kan duhthusam a ni. Kan hun ṭha neih hi bawhpelh kan tum lo a, a ṭha thei ang bera khelh kan duh.
- Kasper Hjulmand, Denmark coach

Lunghlu zai theitu chu lunghlu tho a ni. Team pahnih hi thawhrimna leh tlan chaknaah kan innghat. Keini aia ṭha zawk team counter hmanga hneh tum ṭhin ve ve kan ni a, kan ṭhatna a in ang.
- Jiri Chytry, Czech Republic assistant coach

Czech ho hi team tan an inpe a, an tlarhnung a khawng ṭha hle. Goal an nawrin an tlan chhuak ngam a, an chakna leh tlan theihna hi an ṭhatna a ni a, fimkhur a ṭul dawn a ni.
- Pierre-Emile Hojbjerg, Denmark midfielder

Denmark hi tun inelna chhungin kan zir uluk a, an khelh dan kan hrechiang. Team ṭha an ni a, position tinah player ṭha an kawl a, hneh tur chuan thawhrim a ṭul ang.
- Antonín Barak, Czech Republic midfielder

Harhtharna chang Denmark hmaah team tlo Czech Republic
Euro 2020-a a thiam pariat zingah champion tawh team pali chiah an awm a, chungte chu Spain leh Italy bakah Denmark leh Czech Republic te an ni. Champion rinkai zinga mi England leh Belgium te an la champion ve lo.

Zanin dar 9:30 hian Czech Republic leh Denmark te Baku Olympic Stadium-ah an inkhel dawn a, team intluk tawk an nih avangin a hmuhnawm khawp ang.

Harhtharna
Denmark hian match hmasa berah Finland an hmachhawn a, player pawimawh Christian Eriksen chu thi chhawngin khelmual chhungah a tlu. Danish Dynamite hian duhthlanna harsa an siam a, inkhelh chhunzawm thlangin Iceland lakah 1-0 in an chak lo.

Mahni muala khel Denmark-in team ṭha Belgium an hmachhawn leh a, first half duhthusama ṭhain khel mah se Yussuf Poulsen hmanga goal khat an khung bak an khung belh thei lo. Red Devils-in second half-ah Kevin de Bruyne leh Eden Hazard te an luhtir a, 2-1 in a chak lo.

Denmark hian point la hmu lo mah se last 16 beiseina an nei a, Copenhagen-ah Russia an hmachhawn. Danish Dynamite-in harhtharna an chang ta a; Mikkel Damsgaard, Poulsen, Andreas Christensen leh Joakim Maehle te goal hmangin 4-1 ngawtin an chak.

Last 16-ah pawh Denmark hi an che ṭha chhunzawm a, Wales lakah goal li an khung nawn bakah goal an chhuah lo. Poulsen-a inhliam vanga lut Kasper Dolberg-a'n goal hnih a khung a, Maehle leh Martin Braithwaite ten an khung belh bawk.

Team tlo
Czech Republic-in bul an ṭan ṭha a, match hmasa berah inelna thlengtu zinga mi Scotland chu an mualah 2-0 in an hneh. Czech goal hnih hi striker chhuanvawr Patrik Schick khung ve ve a ni a, goal hnuhnung zawk phei hi chu halfway line pelh deuh aṭanga a khung a ni.

Jaroslav Silhavy hote hian 2018 World Cup finalist Croatia lakah an huaisenna an pholang a, Schick hmanga khung hmasain Croatia nen hian 1-1 in an inhnehtawk. Amaherawhchu Czech hian an match hnuhnung berah England 1-0 in an hneh lo.

Group stage aṭangin Czech hi teh thiam an har a, an nihna tak chu group stage-a chak vek Netherlands lakah an pholang. Czech hian Dutch forward lakah goal an chhuah duh lo a, tlarhnung an ti phui tlat. Inkhel chawhnu lamah Tomás Holes leh Schick hmangin goal an khung a, 2-0 a hnehna changin 1988 champion Netherlands an pet tla - Dutch manager Frank de Boer-a'n a hna a chan phah hial.