Number 1 Barty a chak

Hmeichhe tennis world number 1 Ashleigh Barty chuan Wimbledon third round lut turin harsatna a tawk lo. Barty hian Ningani zan khan Elina Svitolina chu darkar khat leh a chanve chhungin 6-4, 6-3 in a hneh.

All England Club-ah Barty hian a match hmasa berah beisei a phak lo a, clay court season hnu lawka grass court-a inelna hmachhawn kha a awlsam lo. A match hnihnaah erawh a insiamrem tawh tih a lang, a khingpui service vawi ruk ngawt a chhuhsak.

Australian star Barty hian a zawnin Wimbledon third round vawi thum a thleng ta a, season dang a paltlang theih loh hi paltlang tawh ngei a tum - zaninah Katerina Siniakova nen an inkhel chhunzawm leh ang.

Kum 25 mi Barty chuan, "Training-na hmunah thil tam tak ka zir thar a, chu ka thil zir chu inelna takah ṭha taka ka tih theih avangin ka lawm. Vawi khat chak chauh pawh hi a lawmawm, tunah chuan vawi thum ka chak ta," tiin a sawi a, tawp mai erawh a la tum lo.

Inkhel dangah tleirawl duhawm Coco Gauff chuan Elena Vesnina chu 6-4, 6-3 in a hneh a, hnehna chang tur hian darkar khat leh minute 10 bak a mamawh lo; a match lehpekah chuan Kaja Juvan nen an inhmachhawn ang.

Kum 17 mi Gauff chuan, "Centre Court-ah ngei mai ka inkhel leh ta, a nihna takah chuan court dang zawng aiin helai hmunah hi chuan zam a awl. Hmun ropui takah player ṭha tak ka hneh hi a lawmawm," a ti.

Australian Open vawi hnih champion tawh Victoria Azarenka erawh a chak lo. Seeded 12-na Azarenka hi Romanian nula Sorana Cirstea lakah 7-6 (7-5), 3-6, 6-4 in a chak lo.