Fulham coach thar Silva

Premier League aṭanga tla hlim Fulham chuan thawh chhuah leh ngei an tum a, manager thar atan Everton leh Watford pawh lo enkawl tawhtu Marco Silva an lalut - Portuguese manager hian kum thum daih contract a ziak.

Season hmasa khan Scott Parker kaihhruaina hnuaiah Fulham hian EPL an khel a, a bul an ṭan fuh loh avangin a tawp lamah ṭang na viau mah se a inhamtang zo ta lo a ni.

Tunkar tir lam khan Parker hi a hna aṭangin a chawl a, Championship club tho Bournemouth enkawl turin kum thum daih contract a ziak fel leh dim diam tawh - Silva hian Parker hmunruak a luah ang.

Kum 43 mi Silva chuan, "Sulhnu ropui leh ṭha tak nei club ka zawm hi ka lawm, fans lamin min thlawpna thu tam tak min thawn ka hmu a, chona thar ka hmachhawn tur hi ka phur takzet," tiin a sawi.