Juan Mata a cham dawn

Manchester United midfielder Juan Mata chuan Old Trafford-ah kum khat dang cham turin contract thar a ziak a, June 2022 thleng chu Red Devils tan a khel dawn tihna a ni.

Kum 33 mi midfielder hi a contract neihsa chu thla hmasa khan a tawp tawh a, Ole Gunnar Solskaer hnuaia hmun a chan phak loh avangin chhuak mai tur anga ngaih ni mah se contract thar ziah a thlang leh ta zawk.

Mata hian January 2014 khan Chelsea aṭangin Manchester United hi a zawm a, hetihlaia a man zat hi pound maktaduai 37.1 a tling - United tan inelna hrang hrangah match 273 khelin goal 51-a khung a, assist vawi 47 a nei.

Season hman zawh takah khan Mata hian match 18 khelin goal thum a khung a, assist vawi thum a nei - a minute khelh zat hi 861 bak a tling lo!

Spain international hlui Mata hian Chelsea-ah khan Champions League (1), Europa League (1) leh FA Cup (1) nomawi a chawi hman a, United-ah FA Cup (1), League Cup (1). Community Shiled (1) leh Europa League (1) ah a champion tawh bawk - Premier League nomawi a la chawi miah lo.

La Roja tana World Cup leh Euro nomawi pawh lo chawi tawh Mata hian United-a cham tur hian a hlawh a tihniam nia sawi a ni a, £170,000 a hlawh ṭhin aṭangin £100,000 a hlawh tawh dawn niin khawthlang media-te chuan an tarlang.