Verstappen hi rinkai ber a ni - Alonso

Formula 1 vawi hnih champion tawh Fernando Alonso chuan, tun season car intlansiakna sang ber an neih laiah Max Verstappen chu champion tura rinkai ber a nih thu a sawi chhuak.

Red Bull driver Verstappen hian champion lai leh amah hnaih bertu Lewis Hamilton aiin point 18 zetin hma a hruai fal mek. Pathianni zan dar 6:30 hian Red Bull Ring-ah Austrian Grand Prix an tlan leh ang.

Alpine driver Alonso chuan, "Champion rinkai kan sawi a nih chuan Max-a hi a ni ang, ani hi inelna neih laia che ṭha ber a ni mek. Chutih rualin intlansiak pakhat lekah pawh nasa takin thil a la danglam leh hlawk thei," tiin a sawi.

Dutch tlangval Verstappen hi driver ṭha leh huaisen a ni a, mahse a la champion lo. Kum 23 mi a ni tawh a, vanglai a hmang chho mek - kuminah hian rinkai chu a ni ngei a, a elpui Hamilton hneh erawh thil awlsam a ni dawn lo.

Mercedes driver Hamilton-a'n title pasarih a la tawh a, champion hnem ber Micheal Schumacher a nihrual mek. Britain tlangval hi a champion leh a nih chuan record thar a siam dawn, ani tan pawh kawng erawh a harsa ve ang.

Vawi sarih champion tawh Hamilton chuan, "Monaco GP kan tlan aṭang khan harsatna kan tawk, inelna hnuhnung ber kan neih thleng kha chuan kan la inchingfel thei lo chu a ni a, tun ṭumah hian kan chinfel theih ka beisei.

"Red Bull an tlan ṭha thei em em a, driver an ṭhat bakah an car a chak tih kan hmu. Kan elpuite an ṭha a nih chuan anmahni aia ṭha zawka kan chet a ngai tihna a ni mai," tiin inelna hautak hmachhawn nuam a tih thu a sawi.