Giannis tel loin Bucks an chak
Giannis Antetokounmpo awm lo mah se Brook Lopez-a'n a thiam thil lantirna hun ṭha atan a hmang a, point 33 neiin Milwaukee Bucks chu Atlanta Hawks lakah 123-112 in hnehna a chanpui.
Eastern Conference finals series khelh laiah Bucks hian 3-2 in hma an hruai mek; NBA Finals lut turin match khat chak chiah an mamawh tawh. July 4, Pathianni zing dar 6:00 hian game 6 an khelh chhunzawm ang.
A ṭha pahnih awm lo
Bucks hian hliam vangin Giannis Antetokounmpo an chhawr thei lo a, an khingpui Atlanta pawhin ke ruh hliam vangin Trae Young an chhawr thei bik lo - team pahnih hian an ṭhat dan berin an khel thei lo ve ve tihna a ni.
NBA Most Valuable Player (MVP) vawi hnih ni tawh Antetokounmpo inlan thei lo mah se, Bucks player zinga inkhel bul ṭantu panga zinga pali - Lopez, Khris Middleton (26), Jrue Holiday (25) leh Bobby Portis (22) ten point 22 an nei tling vek.
Holiday hian point a neih hnem bakah assist vawi 13 a nei tel a, rebound vawi 13 a la bawk. An thiampuipa awm loh ṭum hian Lopez-a'n playoff a khelh tawh china point a neih hnem ber ṭum a tawng bawk a ni.
A hnai ta...
Bucks hian 1971 khan NBA title an la a, a hnu lamah an la champion leh lo - an nomawi chawi hmasa leh hnuhnung ber a la ni reng. 1974 khan final hi lut leh mah se an hlawhtling lo, kumiah beisei an nei sang mek.
Conference champion ni turin match khat chak chauh an hmabak tawh, an tlang thei hlauh a nih chuan Los Angeles Clippers hnehtu Phoenix Suns nen NBA Finals an khel zui dawn ta zawk a ni.
Bucks player pawimawh Lopez chuan, "Thawhhona ṭhain a rahchhuah chu hei hi a ni, a tawp erawh kan la thleng lo. Playoff china point ka hmuh hnem ber ṭum a ni a, hemi ti thei tur hian Khris leh Jrue te khan min duhsak takzet," a ti.
A la tawp lo
Atlanta tan tlang tur chuan khelh hmabak pahnih an la neih an lak ve ve a ngai dawn. Trae Young hi game 6-ah an chhawr thei dawn em tih a la chiang lo a, player pawimawh tel loa chak dan an zawn a ngai dawn niin a lang.
Bogdan Bogdanovic-a'n point 28 a nei a, ani bakah hian John Collins leh Danilo Gallinari ten point 22 ve ve an nei, player dang zingah erawh langsar khawpa tha thawh hlawk an em lem lo chu an tuar.
Hawks coach Nate Mc-Millan chuan, "Keini aiin tharum an ngah zawk, a tirah na takin min bei nghal a, a tawp thlengin kan tho chhuak zo ta lo," tiin inkhel bul ṭan fuh a pawimawhzia a sawi.
