Engtik hunah nge transfer a tawp dawn?

League tam zawkin nipui transfer tawp hun an ti chiang tawh a, Covid-19 in football a tih buai hma kum 2019 nipui nen kumina transfer kalpui dan tur hi a inang hlawm hle.

Transfer tawp hun hi a nawlpuiiin August 31 a ni dawn a, club khelhna nei lo player (free agent) te chu transfer khar hnu hian a lakluh theih dawn.

Premier League
June 9, Nilaini aṭang khan transfer hawn a ni tawh a, ram leh ram inkar transfer (international) chu July 1 hnuah official-a tih fel chauh a ni.

Kum 2019 khan nipui bazar kha Ningani zan dar 9:30-ah khar a ni a, season ṭan hma match hmasa berah khar a ni. Tunah erawh inenchhinna a zo tawh a, an elpui ram dang aia khar hma an duh tawh lo. Tun hma kal dan pangngaiah an let.

Premier League hi August 14-ah khelh ṭan a ni dawn a, kuminah chuan August thla tawpah khar a ni tawh dawn. Thlasik bazar chu ṭum danga tih ṭhin angin January-ah neih a ni ang.

La Liga
July 1 aṭangin transfer hawn a ni a, August 31 zan dar 3:29-ah khar a ni dawn. Club hian transfer khar hnuah free agent player an lalut thei ang a, transfer inhawnna ramah player an la hralh thei ang a, loan-in an chhuahtir thei bawk ang.

Thlasik bazar hi January 3 aṭangin a inṭan dawn dawn a, January 31-ah a tawp ang.

Serie A
La Liga ang thoin July 1 aṭangin transfer hawn a ni a, August 31-ah a tawp dawn. Ṭum dangah chuan season ṭantirh match hmasa ber hma niah khar ṭhin a ni a, tunah erawh France, Germany leh Spain te kal dan a zawm leh tawh.

Season liam ta khan Italy-ah thlasik bazar a rei lo a, January 18-ah an khar fel. Kuminah erawh January 3-31 chhung hawn a ni leh tawh dawn a, club-in hun thawl zawk an nei thei ang.

Bundesliga
Germany-in August 31 zan dar 9:30-ah transfer hun an khar fel dawn. Chutihrualin free agent player an la la thei a, transfer hawnna league-ah chuan player an la hralh thei a, loan hmangin an la kaltir thei bawk. Thlasik bazar bikah chuan January thla chhung hawn a ni ang.