Ramos-a'n PSG a zawm dawn?

Spanish defender Sergio Ramos chuan Paris St-Germain a zawm dawn niin Ningani khan French radio network RMC chuan a tarlang.

PSG lamah
Kum 35 mi Ramos hi season tawp rual khan a contract a zo a, Real Madrid nen contract chungchangah inremna a neih theih loh avangin 'free agent' a ni mek. Spanish defender hian Los Blancos-ah kum 16 chhung hun a hmang a, Champions League nomawi pali leh La Liga nomawi panga a lakpui.

Season liam ta tawp lam aṭang khan Sergio Ramos hi PSG nen sawi zawm a ni tawh a, tunah thu chiang la awm lo mah se French club hi chu a zawm ngei dawn niin a lang. RMC-in a tarlan danin Ramos hian kum hnih daih contract a ziak.

Ramos hi season liam ta khan inhliam vangin a khel tam tawk lo a, La Liga-ah pawh vawi 15 chauh a inlan. Luis Enrique-a Euro 2020-ah Spain squad-ah Ramos hi a tel lo bawk a, amhaerawhchu Spanish defender hian thla liam ta khan hmasawn zel a tum thu a sawi.

PSG ṭha zawk
PSG hi Tottenham manager hlui Mauricio Pochettino-a'n a enkawl mek a, season liam ta khan Ligue 1-ah pahnihna niin Lille an tluk lo. Champions League-ah French club hian semifinal-ah Manchester City an hneh lo.

Nomawi lian pahnih an chawi loh avangin team ṭha zawk din an tum a, nipui transfer-ah PSG-in thawm an nei lian hle. Netherlands midfielder Giorginio Wijnal-dum chu a thlawnin an lalut tawh. Tunah hian French club hi Italy goalkeeper Gianluigi Donnarumma leh Inter Milan right back Achraf Hakimi nen sawi zawm a ni mek.

Mi bik Ramos
Spain tan vawi 180 inlana goal 23 khungtu Ramos hian kum 2004 khan Sevilla aṭangin Real hi a zawm a, kum 2015 aṭang khan club captain atan ruat a ni bawk - Real tan inelna hrang hrangah match 671 a khel a, defender ni chungin goal 101 a khung.

Real-ah kum 16 a cham chhungin La Liga (5), Copa del Rey (2), Spanish Super Cup (4), Champions League (4), UEFA Super Cup (3) leh FIFA Club World Cup (4) ah te a champion pui a, khawvela defender ṭha ber ang hiala ngaitu tam tak a nei.

Real Madrid president Florentino Perez chuan, "I hnathawh avang hian ka chhuang takzet che a, fan-te tana entawn tlak, hnial rual loha Real Madrid legend i ni," tiin a captain hi a lo thlah a ni.