Sancho rawn invawrh chhoh dan

Borussia Dortmund-in Manchester United nen Jadon Sancho chungchangah inremna an neih thu an puang a, English club pawhin an tichiang tawh. Man United chuan, "Jadon Sancho chungchangah Borussia Dortmund nen a thuphungin inremna kan nei. European championship zawhah inremna hi ziah a ni ang a, medical test pawh tihfel a ni ang," tiin thuchhuah an siam.

Euro 2020-ah Gareth Southgate-a'n Sancho hmang tam tawk lo mah se Manchester United tan erawh an mamawh tak player 'out and out winger' an la hi chanchinṭha a ni a. English winger Sancho manah hian pound maktaduai 73 (€85m) an sen a ṭul dawn a ni.

Wigan hunlai"
February 13, 2014 zan dar 9:28-ah chuan kum 13 mi Sancho chuan twitter account a nei thar a, khawvel hmuh tura thu dahchhuah hmasak ber chu, "Inkhelh ni, Arsenal nen," tih a ni.

India sana zing dar 2:10-ah a rawn lang leh a, anni sanaah chuan zan dar 8:40 a ni. "Arsenal nen 2-2 in kan inhnehtawk! Freekick ṭha zet ka khung," tih a rawn ziak a, Watford Under 15 tana khel player hi tumahin an ngaihsak lo. A thil ziah an reply hmasak ber chu kum ral hnuah a ni a, Borussia Dortmund-ah star player ni tawhin Manchester United nen an sawi zawm tawh.

Hun a kal chak a, Jadon Sancho tan pawh a danglam lo. Watford academy coach hlui Louis Lancaster chuan Sancho hnenah hian a thil tum a zawt a, rawlthar duhawm chuan, "Europe club lian leh ram tana khelh ka duh," tiin a chhang. Lancaster hian a duh chhan a zawt leh ngat a, Sancho chuan, "Ka chhungte hian ka hnathawh hi chhuang se ka duh," tiin a sawi. Watford academy coach hlui hian Sancho hi a tumah a chian thu a sawi.

Thawnthu hlui chu
Sancho hi kum 11 a nihin London chhim lama awm Kennington-a an chenna chhuahsanin Watford youth academy bula awm Harefield Academy-ah zirna a zawm. Naupang dang ang thoin Sancho hi lungleng mi a ni a, a chhungte bakah a ṭhenrual ṭhate a ngai ṭhin hle. Amaherawhchu Sancho hian, "Kennington nuam ti mah ila, football-a ei zawng tur chuan ka chhuahsan a ngai," tiin thutlukna a siam chhan a sawi.

Kum 13 a nihin Sancho hi Watford academy a kum 16 zingah a hel tawh a, heta ṭang hian Lancaster-a'n a hmelhriat ṭan. Lancaster chuan "Kum 13 mi tan chuan kum 16 zingah chuan tel ve theih hram kha a pawimawh a, Sancho erawhin second 10 chhung lekin a ṭha tawk tih a pholang thei nghal. Thil pahnih hmuh ka nei, a ke aṭanga a lu thlenga a chet dan chu a hrang hlak. Pakhat leh chu a inrintawkna a ni. Hetiang ho chu thil thleng tur hmu lawk thei ka ti mai a, hun a nei rei bik. Midang tana second khat hi anni tan chuan minute khat ang deuh tho a ni. A tlan chak lai ber pawhin duhthusamin ball a khawih thei," tiin a dah sang hle.

London biala player ṭha zawngtu Manchester City scout Joe Shields-a'n Sancho hi a hmu fuh a, kum15 a tlin ruala la turin thutlukna an siam. Lancaster chuan Sancho hian, "Watford-a a hun tawp lamah thil thlen dan a sawi duh lo a, team aṭangin a inla hrang bawk," tiin a sawi. Man City-in Sancho an la a, zângnadawm nan £66,000 an pe a, hei hi £500,000 thlenga la pung chho thei a ni.

A famkim lo
Manchester-ah Sancho-a'n hun a hmang choh a, club thuneituten an nungchangah rinhlelhna an nei. Sancho hi City academy player-te inzirna St Bede’s College-ah a tlai fo a, training session leh meeting-naah a tlai ṭhin bawk. Chutihrualin Sancho theihna an hmuh chian avangin an hre thiam a, a famkim lohna lai siam ṭhat chu an hnaah an ngai zawk.

Man City Under 16 tana a inkhelh hmasak berah goal nga a khung nghal a, he team-ah hian Malaga aṭanga an lakluh thar Brahim Diaz leh Phil Foden te an awm a, season khat chhungin hneh loh an tawng lo. Kum 2015 nipui khan Greece-ah Elite Neon Cup an khel a, Sancho leh Foden te inkawp an hmuhnawm a, an champion. Foden chu player of the tournament a thlan a ni a, Bobby Duncan chu top scorer niin Sancho erawh khel ṭha mah se mimal lawmman a dawng lo.

Pep-a hnuaiah
Kum 2016 nipuiah Pep Guardiola-a'n Manchester City a zawm a, Foden leh Sancho hi first team zinga inzir tura sawm ṭhin a ni. Player talent nei ṭha rual David Silva, Kevin De Bruyne, Raheem Sterling leh Sergio Aguero zingah pawh tlangnel takin an khel thei.

Sancho leh Foden ten theihna sang tak an nei a, chutihrualin Foden a danglamna erawh Man City ṭantu chhungkua aṭanga seilian an ni. Premier League 2 inelnaah Sancho-a'n match tin deuh thoah goal a khung a, UEFA Youth League-ah a khelh ṭhat bawk avangin first team tana khelh a duh - League Cup-a hun rei lote chhung luh a duh lo.

Kum 17 a tlinin Sancho hi Man City-in kar khata £30,000 hlawh turin an sawm a, contract ṭha tak ni mah se an pawm thei lo - chhuah an duh. Contract-ah inremna a awm theih loh avangin Pep Guardiola-a'n season thar atana inpuahchahna United States a tel turah a telh lo a, Diaz leh Foden te erawh zinchhuahnaah an che ṭha hle.

First team an zinchhuah lai hian Sancho hi a kum rualpui bula inzir tur a nih laiin training a zawm duh lo a, club nen an boruak chhe sa a chhiat belh. Guardiola bakah club neitu chairman Khaldoon Al Mubarak ten Sancho hi chelh tumin an bia a, an hmin thei lo.

Dortmund lamah
Transfer tawp ni September 2017-ah Sancho-a'n Borussia Dortmund a zawm ta a, German club hian English winger manah hian dollar maktaduai 10 bawr velin an seng. Dortmund sporting director Michael Zorc chuan, "European football-a talent nei ṭha ber zinga mi a ni," tiin a sawi a, senior team tana a khelh tur thu a sawi.

Guardiola pawhin, "Theihtawp kan chhuah a, hlawh chungchang a niin ka hre lo. Dortmund hi khelh tam duh vangin a zawm a, ka hriatthiampui. Kan bul aiin Dortmund-ah khelh tam a inbeisei a ni," tiin a chhuah chhan a sawi.

Dortmund-ah hian player talent nei ṭha dang Christian Pulisic, Ousmane Dembele leh player ṭha tak takte nen Sancho hi an awm ho a, German club hian first team-ah chhawr an duh avangin India rama neih U17 World Cup (2017)-ah pawh khan an ko let hma reng a ni.

England team-ah hian Phil Foden, Callum Hudson-Odoi leh Emile Smith Rowe te an awm a, player ṭha zingah pawh Sancho hi a langsar, match hmasa pahnih aṭangin goal thum a khung. Inelna hi October 6-28, 2017 khan neih a ni a, Dortmund-in Sancho hi an koh let avangin match hnihah chauh a inlan.

Sancho hi October 27 khan Eintracht Frankfurt nen an inkhelh ṭumin Borussia Dortmund tan a inlan ṭan a, minute ruk la awmin a lut. January 14, 2018-ah Dortmund tan a vawi khat nan bul a ṭan a, VfL Wolfsburg nena an inkhelhah hian goal lut lo mah se woodworkd a tih per. April 21, 2018-ah goal a khung a, Bayer Leverkusen 4-0 in an hneh a, he inkhelah hian assist vawi hnih a nei bawk.

English winger hian Dortmund tana a season hmasa berah goal khat a khung a, season hnih aṭangin player pawimawh a ni ṭan. Kum 21 mi chauh la ni mah se season thum chhung Dortmund-ah player pawimawh a ni tawh a, inelna hrang hrangah match 140 khelin goal 50 a khung.