England-in nuamsain semifinal an lut

Kum 1996 hnua a vawi khat nan England chuan European Championship semifinal an lut ve leh ta - an phu takzet bawk e!

Inrinni zan khan Three Lions hian quarterfinal-ah Ukraine chu 4-0 in an hneh a, Harry Kane chuan goal hnih khungin Harry Maguire leh Jordan Henderson ten goal khat ve ve an khung bawk. Rome khawpuia team pahnih an intawn hmain Kane-a'n, "Wembley Stadium-ah kan kir leh ngei ka beisei," a ti a, semifinal khel tura an khelmual ropui ngeia kir leh an tum thu a sawi.

Kane-a sawi ang ngeiin a thiam pali zingah England an inhlangkai a, Nilaini zan dar 12:30-ah Denmark nen final luh an inchuh ang.

Kawng inang lo
Euro 2020-a quarterfinal luh phu lo ber thlang dawn ta ila, Ukraine hi a tam zawkin an thlang ang - group stage match thumah North Macedonia chiah an hneh a, pathumna ti ṭha pali zinga telin last 16 an lut.

Round of 16-ah pawh 'top team' zinga chhal ni lo Sweden an hmachhawn a, hun pangngaiah 1-1 a an inhnehtawk hnuin extra time an khel - Marcus Danielson red card vangin minute 20 chuang chu a tam zawkin an khel a, injury time-ah chakna goal an khung zui.

England erawh an match hmasa berah Croatia tumin fiahna an hmachhawn nghal a, Scotland leh Czech Republic kha fiahnaah kan ngaihsak lo a nih pawhin Germany laka an fiahna hmachhawn erawh thai bo theih a ni lo.

Team pahnih squad piahlamah an kalkawng ringawt thlir pawhin England-in chak tura ringtu an ngah zawk a, football thlirna aṭanga thlir pawhin semifinal lut tura duhsaktu an tam zawk ang.

A hming Kane
England tan striker chhuanvar Harry Kane-a'n group stage-ah goal a khung miah loh avangin sawisel a tawk nasa a, mahse, top class striker a nih miau avangin a laka beiseina erawh a thi lo.

Germany lakah a khel ṭha lo chungin Kane-a'n a thiam a la theihnghilh lo tih a pholang a, striker class bik tan chauha khung theih goal a khung - hawi kir a tum tawh lo tih Ukraine lakah a pholang zui. Tottenham Hotspur striker hian minute lina lekah Raheem Sterling-a siamsak ball ṭha mi chu goal-ah a chantir a, player pahnih 'inman' dan hi England fan-te tan chuan hmuhnawm a tling ang.

Kane hian goal khatah a duhtawk lo - minute 50-naah a goal hnihna a khung leh a, tun inelnaah goal thum a khung tling der tihna a ni. Kane-a goal khung karah hian Maguire chuan goal khat a khung bawk.

England an ṭha
Three Lions-in goal thum an khung hnuah England squad chhahzia pholan nan Jordan Henderson chuan goal khat a rawn khung ve leh a, Liverpool captain hi minute 57-naah Declan Rice thlak tura luhtir a ni.

Euro 2020-a minute sarih chiah la inkhel Jadon Sancho chu Ukraine lakah bul ṭantir a ni a, Manchester United player thar hian bul ṭan a phu tih pholangin a khel ṭha hle. Arsenal rawlthar duhawm Bukayo Saka erawh inhliam vangin squad-ah a awm lo.

Luke Shaw lam hmaih a thiang lo - Croatia laka Kieran Trippier-a'n a hmun a luahsak hnuah Shaw a lo kir ṭha a, Ukraine lakah pawh Maguire goal khungna tura a freekick leh Kane-a siamsakte chu a 'class' pholangtu an ni.

Mason Mount-a'n Covid-19 vanga khunghran a nih hnuah a theihna sanzia a pholang leh ta a, England hian bench lamah Jack Grealish, Marcus Rashford leh Phil Foden te ho an la ṭhuttir tih hriat tel a ṭha.

Inkhel Chhehvel
• Sir Alf Ramsey (1966 & 68) hnuah Gareth Southgate chu World Cup leh European Championship semifinal-a England hruai thleng thei manager hmasa ber a ni.
• Three Lions hian a vawi khat nan match sarih chhung chu a zawnin goal an chhuah lo tawh a, minute 662 chhung chu an goal an venghim thei tihna a ni.
• Ukraine-in major tournament-a an tlawm chian ber ṭum an tawng a, World Cup 2006 khan group stage-ah Spain chu 4-0 in an lo ngam lo tawh bawk.
• Sterling chu ram tana match a khelh hnuhnung 21-ah goal 22-ah a inrawlh a, goal 15 khungin assist vawi sarih a nei. Kane hian ram tana a inlan hnuhnung 26-ah goal 27 a thawk chhuak a, vawi 18 goal khungin vawi kua assist a nei.
• Sterling-a'n Kane goal khung tur vawi ruk a siamsak tawh a, kum 2000 hnua England player-in ram tana a khelhpui player pakhat tana assist a ngah ber record a ni.
• Shaw-a'n Maguire goal khung tur a siamsak a, David Beckham-a'n Paul Scholes (vs Portugal, Euro 2000) tana assist a neih hnua Manchester United player-in Red Devils tana a khelhpui, England tana major tournament-a assist a neihsak hmasa ber a ni.
• England keeper Jordan Pickford-a'n tun inelnaah clean sheet vawi nga a nei ta a, Euro inelnaah tournament khata heti zat clean sheet nei thei keeper an la awm ngai lo.

Player inlante
Ukraine: Bushchan; Zabarnyi, Kryvtsov (Tsygankov 35'), Matviyenko; Karavaev, Sydorchuk (Makarenko 64'), Shaparenko, Zinchenko, Mykolenko; Yarmolenko, Yaremchuk

England: Pickford; Walker, Maguire, Stones, Shaw (Trippier 65'); Rice (Henderson 57'), Phillips (Bellingham 65'), Mount; Sancho, Kane (Calvert-Lewin 73'), Sterling (Rashford 65')

A ropui takzet - kum thum chhungin semifinal vawi thum zet kan lut ta. Mahse, step hnih lek pen leh kan duh dawn a ni. Germany leh Ukraine laka kan result-in mi tam tak tana hlimna a thlen hian minti lawm takzet.
- Gareth Southgate, England coach

Tournament ṭha tak kan hmangin ka hria. Khelh dan phung nghet sa kan nei a, eng team pawh hmachhawn ila, ka player-ten chu an khelh dan chuan an khel mai ṭhin. Chumi aṭanga thlir chuan ka nauten an khel ṭha a, an theihna zawng zawng an hlan avangin lawmthu ka hrilh duh a ni.
- Andriy Shevchenko, Ukraine coach