Belgium 'golden generation' aia thiam Italy

Italy-in Nicolo Barella leh Lorenzo Insigne te goal ropui hmangin champion rinkai zinga mi Belgium 2-1 in an hneh a, European Championship 2020-ah semifinal an lut. Roberto Mancini hoten semifinal-ah Spain an hmachhawn ang.

Zirtawpni zan khan Allianz Arena, Munich-ah inkhel hmuhnawm chhawp chhuah a ni a, Azzuri tan Barella leh Insigne ten first half-ah khungin Romelu Lukaku penalty hmangin Red Devils-in hun chanve hmalamah vek penalty hmangin sut mah se second half-ah goal a luh belh tawh lo.

KDB a dam!
Portugal lakah inhliam vanga lakchhuah Kevin de Bruyne leh Eden Hazard-a te chungchangin ngaihven a hlawh. Belgium tan chanchin ṭha hriat tur a awm a, De Bruyne chu dam chiang loin bul ṭantu zingah telh a ni.
Hazard erawh a dam hman lo a, squad-a telh a ni lo. Roberto Martinez-a'n rawlthar duhawm Jeremy Doku chu bul ṭantu zingah a rawn dah bawk. Red Devils tlarhnunghah captain Jan Vertonghen, Thomas Vermaelen leh Toby Alderweireld te an awm a, Italy tlarhma che rangte nena an inhmachhawn tur chu en châkawm a tling.

Roberto Mancini pawhin tlarhnungah Leonardo Bonucci kawppui turin captain Giorgio Chiellini a dah lut a, tlarhmaah Austria laka goal pawimawh khungtu Federico Chiesa chu Domenico Berardi aiah a thlang. Marco Verratti leh Manuel Locatelli te pahnih inkara lut tur zawk tihchian a ni a, tawnhriat nei ṭha zawk Verratti thlan a ni.

Italy an hmuhnawm
FIFA ranking-a number 1 ni mek Belgium aiin Italy-in bul an ṭan ṭha zawk a, an khel a hmuhnawm zawk. Minute 13-na lekah Italian defender Bonucci-a'n freekick aṭanga ball kal chu su lut mah se VAR hmanga en let hnuah offside vangin goal-ah pawm a ni lo.

Player ṭha bik Kevin de Bruyne theihna hmuh chhunzawm a ni a, Manchester City midfielder hian ṭha taka a lakluh hnuah box pawna aṭanga a pet chu keeper Gianluigi Donnarumma-a'n a dang ṭha hle. Minute 31-naah Barella hmangin Italy-in hma an hruai a, goal ṭha ni mah se Belgian tlarhnungin an tih tur an ti tawk lo.

Italy freekick pet aṭanga ball kal zel chu captain Vertonghen-a'n pet chhuak mai loa a khalh avangin Azzuri-in chance ṭha an neih phah a, Belgian tlarhnunga awm Vertonghen, Vermaelen leh Thorgan Hazard ten penalty chawi an hlauh avangin Barella a tal put a, goal ṭha a khung.

Minute 44-naah Insigne-a'n goal ropui a khung a, Belgian defender Alderweireld-a'n a hnaih har avangin mawhphurtu zingah a tel. Red Devils beiseina siam turin Doku-a'n Di Lorenzo lakah penalty a hlawh chhuak a, first half injury time-ah Lukaku-a'n a pet goal.

Second half-ah Italy tlarhnung fiah a ni a, Chiellini-a hoten fiahna paltlangin goal an chhuah lo. Chutihrualin Doku-a'n fak a phu a, kum 19 mi Belgian forward hian a thiamna leh chakna hmangin Italy tlarhnung a rum ṭhaih a, goal erawh a keng tel bik lo. Goal khung thei bik striker tia sawi Lukaku pawhin penalty aṭang bakin a khung thei lo a, Inter Milan striker hian goal khung theih ngeina tura ngaih ṭum hnih a hlah.

Spinazzola a inhliam
Minute 79-naah inhliam vangin Leonardo Spinazzola lakchhuah a ni a, Italian wing back hi Euro 2020-ah a inlan thei tawh dawn lo. Kum 28 mi Spinazzola hian inelna ṭha tak a hmang a, match nga khelh tawh aṭangin vawi li a khel a, a khelh lohna inkhelh pawh hi group stage-a hmahruaitu an nih tawh hnuah a ni.

Roma defender Spinazzola hi Euro 2020-a player tlan chak ber a ni a, a hmunruak hi Chelsea defender Emerson tan hnawhkhah a harsa dawn. Spinazzola inhliam hi 'achilles tendon' a ni a, thla li tal chu a chawl tura ngaih a ni.

Chak phu Italy
Spinazzola a inhliam avangin Italy tan lawm a kim lo a, chutihrualin inkhel bik chauh thlir chuan lawmna tur hlir a ni. Keeper Donnarumma a rintlak a, veteran defender Bonucci leh Chiellini te an khel ṭha hle.
Mual laia ding Jorginho-a'n team a kaihruai a, Chelsea midfielder hi Italy-in game hmuhnawm an khelh theihna chhan tia sawi theih a ni. Chutihrualin Jorginho bula ding Barella leh Verratti te hming lam hmaih a thiang lo.

Tlarhma lamah Ciro Immobile-a'n a theihna tak pho chhuak lo mah se Insigne erawh a la vul chho zel a, Chiesa pawhin goal a khung lo chungin fak a phu. World Cup 2018-a tel pha lo Italy-in heti taka Euro 2020 an khelh ṭhat theih chhan erawh Mancini a ni a, Manchester City manager hlui hi team remkhawmtu a ni.

Goal ropui khungtu Insigne
Italy forward Lorenzo Insigne-a'n minute 44-naah halfway line thlen hma hret aṭangin Nicolo Barella ball pek chu a khalh ṭan a, mual sir lamah khalh pheiin Youri Tielemans a bum hnuah box pawn aṭangin mawi zetin Belgium lakah a hlai goal.

Kum 30 mi Insigne hi 5ft 4in leka sang a ni a, Napoli captain niin player danglam bik a ni. Italian forward hian Turkey nen an inkhelh ṭumin Euro 2020 match hmasa berah goal a khung tawh a, Allianz Arena-a a goal khung hi chu goal ropui bik a ni.

Insigne chuan, "Ka hmaa Youri Tielemans ding kha ka hmu a, yellow card a hmuh tawh avangin ka khalh pelh theih ka inring," tiin a insawi. Napoli forward hian Tielemans a bum a ni ringawt lo a, box pawn aṭangin keeper ṭha Thibaut Courtois-a dan theih loh turin a pet goal.

Euro 2020 quar-terfinal-ah Italy-in Belgium 2-1 in an hneh a, semifinal an lut.

Player inlante
Belgium: Courtois; Alderweireld, Vermaelen, Vertonghen; Meunier (Chadli 69', Praet 73'), Witsel, Tielemans (Mertens 69'), T. Hazard; De Bruyne, Lukaku, Doku

Italy: Donnarumma; Di Lorenzo, Bonucci, Chiellini, Spinazzola (Emerson 79'); Barella, Jorginho, Verratti (Cristante 74'); Chiesa (Tolói 90+1'), Immobile (Belotti 74'), Insigne (Berardi 79')

Engtiklai mah khan harsatna lian tham kan tawk loin ka hria. Belgium anga team ṭha hneh tur chuan khelh ṭhat bik a ṭul a, chutiang chiah chuan kan khel a ni.
- Roberto Mancini, Italy coach

Player zawng zawngin an khel ṭha vek. Training-na aṭang tawhin khatianga khung kha ka châk ṭhin a, ka khung ta kha ka lawm. Goal ropui a ni a, amaherawhchu kan chakna chhan chu inlungrualna a ni.
- Lorenzo Insigne, Italy forward

Chak tumin kan theihna zawng zawng kan chhuah. Goal ropui an khung a, chutihrualin an goal hmasa zawkah kha chuan kan tih tur kan ti tawk lo. Inelna aṭanga tlak hi chu a hrehawm a ni.
- Kevin De Bruyne, Belgium midfielder

Hrehawm kan ti hle. Goal khungna hun ṭha vawi hnih kan nei a, an keeper-in an dang ṭha. Chutihrualin goal khatna kha kan chhuah ho deuh. Tu zawk pawh kha chak thei kan ni a, Italy kha a phu zawk an ni.
- Thibaut Courtois, Belgium goalkeeper